America atụọla ogbunigwe ọzọ n'agwaetiti mba Iran dị na Strait of Hormuz dịka ntuliaka oge etiti ha na-amalite

Donald Trump, Onyeisiala mba America

Ebe foto si, Reuters

Nkọwa foto, Donald Trump na-enwete nrụgide sitere n'aka ọhanaeze nakwa n'ime otu ndọrọndọrọ ọchịchị ya ka ọ kwụsị agha dị n'etiti America na Iran
    • Onye dere ya, Sareen Habeshian
  • Mgbe e biputara ya
  • Oge e ji agụ akụkọ nkeji 4

Mba Amerịka atụọla ogbunigwe n'agwaetiti Qeshm nke dị na Strait of Hormuz, dịka ndị ọrụ ọchịchị US gwara ụlọọrụ ntaakụkọ CBS.

Ụlọọrụ mgbasaozi steeti Iran bụ IRNA, kwuru na ọtụtụ mgbawa mere n'agwaetiti ahụ n'ụtụtụ Mọnde.

Ndị ọrụ Amerịka kwuru na mwakpo ahụ pere mpe ma bụrụ nzaghachị nye egbe ha kwuru na ndịagha Islamic Revolutionary Guard Corps (IRGC) nke Iran gbara ụgbọelu ndịagha America.

BBC akpọtụrụla US Central Command (Centcom), ngalaba ndịagha America na-ahụ maka ọrụ agha na mpaghara Middle East, ka ha kwuo okwu banyere mwakpo ahụ.

Ihe a na-eme tupu ntuliaka etiti oge a kpọrọ midterm elections nke America, nke ga-ekpebi ma ndị Republican maọbụ ndị Democrat ga-achịkwa ụlọomeiwu mba America.

Donald Trump na-enwete nrụgide sitere n'aka ọhanaeze nakwa n'ime otu ndọrọndọrọ ọchịchị ya ka ọ kwụsị agha dị n'etiti America na Iran. Agha a malitere mgbe America na Israel wakporo Iran n'ọnwa Febụwarị.

Na mbụ n'ụbọchị Mọnde, Trump gwara ndị ntaakụkọ na ọ naghị eme ọsọ ọsọ ime ka mwakpo ndị a n'Iran kwụsị.

O kwuru sị: "N'otu ụzọ maọbụ ọzọ, anyị ga-eme ihe, ma ọ dịghị ngwa ngwa. Anyị emebiela akụnaụba ha nke ukwuu."

Ọ gwara ụlọọrụ mgbasaozi Axios sị: "Ha enweghị ego, ha enweghị mmanụ ụgbọala, ike amalitela ịgwụ ndị obodo ha n'ihi ọnọdụ a."

Skip content and continue reading

End of content

Maapụ nke Strait of Hormuz na-egosi ụsọ mmiri Iran nke dị n’ugwu, yana ụsọ mmiri Oman na United Arab Emirates (UAE) nke dị na ndịda. A kpọrọ aha ọtụtụ àgwàetiti ndị dị n’ime osimiri ahụ, gụnyere Hormuz, Larak, Qeshm, na Hengam nke dị nso na Iran. E gosikwara Greater Tunb, Lesser Tunb, na Abu Musa, ndị dị n’ebe ndịda ọdịda anyanwụ. Ahịrị uhie ndị dị na maapụ ahụ na-egosi oke mpaghara akụ na ụba pụrụ iche nke mba dị iche iche n’osimiri (Exclusive Economic Zones ma ọ bụ EEZ). Ebe gbara Greater Tunb, Lesser Tunb, na Abu Musa gburugburu ka e depụtara dịka “Mpaghara a na-arụrịta ụka” ma ọ bụ “Mpaghara esemokwu”. Nkọwa dị n’ala maapụ ahụ kwuru na EEZ na-enye mba ọ bụla ikike pụrụ iche iji nweta ma jikwaa akụ ndị dị n’ime mmiri ya, dịka azụ na mmanụ, ma n’otu oge ahụ na-ekwe ka ụgbọ mmiri mba ụwa na-aga ma na-alaghachi n’ụzọ ha n’enweghị ihe mgbochi.

Ọ gbakwụnyere na US nwereike "ịga wakpo Pickaxe", ebe e kwuru na o nwere njikọ na mmepụta ngwagha nuklia nke Iran, n'ajụjụọnụ ya na Fox News n'abalị tupu ntuliaka etiti oge (midterm elections).

Trump kwuru na nke a "abụghị nnukwu nsogbu" nakwa na a pụrụ ime ya n'ime "otu awa".

N'ime ụbọchị ole na ole gara aga, ọtụtụ mmadụ amalitela iche na America nwereike ịmaliteghachi nnukwu mwakpo megide Iran mgbe ntuliaka etiti oge ahụ gachara. Mana mgbe otu onye ntaakụkọ jụrụ Trump na Mọnde ma nke a ọ bụ eziokwu, ọ zara, sị: "Mba."

Minista na-ahụ maka mmekọrịta mba ọzọ nke Iran bụ Abbas Araghchi, gwara IRNA na mbụ na mkparịtaụka "siri ike nke ukwuu" na-aga ugbua site n'aka ndị ogbugbo, iji chọọ ụzọ iji kwụsị agha ahụ n'etiti Iran na America.

Ọ kwukwara na Tehran dị njikere ugbua karịa mgbe ọbụla ọzọ maka ụzọ abụọ ahụ, ma nke ndọrọndọrọ ọchịchị na mkparịtaụka udo, ma nke agha.

Ma sị na ọ dị mba America n'aka ịhọrọ ma ọ ga-agbaso "ụzọ amamihe" nke mkparịtaụka maọbụ mee "njehie nke mwakpo agha".