’انٹرنیٹ صارفین کے حقوق اور ڈیٹا کے تحفظ کا قانون ضروری‘

،تصویر کا ذریعہPA
- مصنف, عزیز اللہ خان
- عہدہ, بی بی سی اردو ڈاٹ کام، پشاور
- وقت اشاعت
پشاور میں سول سوسائٹی کے نمائندوں نے وفاقی حکومت سے مطالبہ کیا ہے انٹرنیٹ استعمال کرنے والے صارفین کے حقوق اور ان کے ڈیٹا کے تحفظ کا قانون بھی منظور کرایا جائے گا۔
سائبر کرائم بل یا پریوینشن آف الیکٹرانک کرائم ایکٹ پر شروع سے ہی سول سوسائٹی کے اراکین کی جانب سے تنقید کی جا رہی تھی۔ اس بارے میں مختلف فورمز پر مباحثے کیے گئے اور حکومت سے کہا گیا کہ اس میں بڑے پیمانے پر ترامیم کی ضرورت ہے۔
٭ <link type="page"><caption> ’اب پاکستانی سوشل میڈیا سہما سہما رہے گا‘</caption><url href="http://www.bbc.com/urdu/pakistan/2016/08/160811_cyber_crime_bill_concerns_tk" platform="highweb"/></link>
اب اس قانون کو منظور کر لیا گیا ہے لیکن سول سوسائٹی کے رہنماؤں کا کہنا ہے کہ وہ اس بل کے تمام پہلوؤں پر نظر رکھے ہوئے ہیں۔
اخباری کانفرنس سے خطاب میں پختونخوا سول سوسائٹی کے رہنما قمر نسیم کا کہنا تھا کہ انھوں نے ملک کے تمام بڑے شہروں میں سول سوسائٹی کے اراکین سے اس قانون پر رائے لی ہے اور اب یہ فیصلہ کیا ہے کہ اس قانون پر عملدرآمد پر کڑی نظر رکھی جائے گی کہ اس قانون کے تحت کن لوگوں کے خلاف کیا کارروائی ہوتی ہے۔
ان کا کہنا تھا کہ ان کی اطلاع کے مطابق اس قانون کے تحت ایک مقدمہ درج کیا گیا ہے جس کی وہ معلومات حاصل کر رہے ہیں اسی طرح وہ اس قانون کے تحت دیگر مقدمات پر کا ریکارڈ بھی حاصل کریں گے۔

،تصویر کا ذریعہSPL
انھوں نے اس قانون کے ان شقوں میں ترامیم کا مطالبہ کیا ہے جو انسانی حقوق سے متصادم ہیں اور کہا ہے کہ سول سوسائٹی پاکستان میں ڈیٹا پروٹیکشن کے لیے قانون سازی کے لیے کوششیں کرے گی۔
انھوں نے کہا کہ سائبر کرائم میں صارفین کے حقوق کا خیال نہیں رکھا گیا کہ آیا ان کا ڈیٹا محفوظ ہے یا نہیں اس لیے وہ کوشش کریں گے کہ ایک پرائیویسی کمیشن کا قیام عمل میں لایا جائے۔
End of سب سے زیادہ پڑھی جانے والی
پشاور میں سول سوسائٹی کے اراکین نے سائبر کرائم کے قانون کی منظوری سے پہلے بھی اس قانون کی مخالفت کی تھی۔ ان اراکین کے مطابق یہ قانون آزدی رائے اور آزادی اختلاف رائے کے خلاف ہے۔
سول سوسائٹی کے اراکین نے اس فیصلے پر بھی افسوس کا اظہار کیا ہے جس میں وفاقی تحقیقاتی ادارے یعنی ایف آئی اے کو سائبر کرائم ایکٹ کی تفتیش کے اختیارات تفویض کیے گئے ہیں۔
قمر نسیم کے مطابق ’اگرچہ پاکستان میں تین کروڑ لوگ انٹرنیٹ استعمال کرے ہیں لیکن پاکستان میں پولیس تھانوں میں بیٹھے اہلکار اس قانون سے واقف نہیں ہیں۔‘



















