لانگ مارچ کے لیے خصوصی سکیورٹی پلان

،تصویر کا ذریعہBBC World Service
پاکستان کے وزیراعظم کے مشیر داخلہ رحمان ملک نے کہا کہ دفاع پاکستان کونسل کے لانگ مارچ کے لیے خصوصی سکیورٹی پلان ترتیب دیا گیا ہے جس کے تحت لانگ مارچ کی گزرگاہوں کی سی سی ٹی وی کیمروں اور ہیلی کاپٹروں کے ذریعے نگرانی کی جائے گی۔
مذہبی جماعتوں پر مشتمل دفاع پاکستان کونسل نے حکومت کی جانب سے نیٹو سپلائی بحال کرنے کے خلاف لاہور سےلانگ مارچ کا آغاز کر دیا ہے جو شام کو اسلام آباد پہنچےگا جہاں پارلیمنٹ ہاؤس کے سامنے ایک جلسہ ہوگا۔
رحمان ملک نے اسلام آباد میں صحافیوں سے بات چیت کرتے ہوئے کہا کہ وہ اس بات کو یقینی بنانے کی کوشش کریں گے کہ اس لانگ مارچ میں کوئی شدت پسند یا کالعدم تنظیموں کے افراد شامل نہ ہوں۔
انہوں نے کہا کہ ’ سکیورٹی کے جتنے اقدامات کیے جا سکتے تھے ہم نے کیے ہیں، جب ہجوم ہوتا ہے تو اس میں کوئی بھی داخل ہوسکتا ہے کیوں کہ کسی کے ماتھے پر یہ نہیں لکھا ہوتا ہے کہ وہ دہشت گرد ہے، لیکن اس کے لیے ہم نے جدید آلات سے تلاشی کے انتظام کے ساتھ ساتھ انٹیلیجنس بہت رکھی ہے‘۔
رحمان ملک نے کہا کہ پولیس اور خفیہ ادارے الرٹ ہیں اور وہ اس بات کو یقینی بنانے کی کوشش کریں گے کہ کوئی بھی شر پسند عناصر جلوس میں شامل نہ ہوں۔
رحمان ملک نے لانگ مارچ کے موقع پر اسلام آباد میں سکیورٹی پلان کی تفصیل بتاتے ہوئے کہا کہ لانگ مارچ کے پیش نظر اتوار شام چھ بجے سے ہی شہر میں نسبتاً سکیورٹی سخت کر دی جائے گی اور اسلام آباد آنے والے افراد شناختی کارڈ اپنے ساتھ رکھیں۔
انہوں نے مزید کہا کہ مارچ کے موقع پر کل شام چار بجے اسلام آباد کے دوکانداروں نے بھی یقین دلایا ہے کہ وہ اپنی دوکانیں بند کردیں گے۔
’وہ لوگ جو خیبر پختونخواہ یا مری سے آرہے ہیں وہ فیض آباد سے اسلام آباد میں داخل ہوں گے اور انھیں کسی اور چھوٹے راستے سے داخل نہیں ہونے دیا جائے گا اور سفارت کاروں کے لیے سکیورٹی انتظامات کے پیش نظر ریڈ زون میں بھی لوگو کا آنا جانا نسبتاً کم رہے گا، جن کو ضرورت ہے وہیں آئیں‘۔
End of سب سے زیادہ پڑھی جانے والی
اسلام آباد میں دفاع کونسل کا اجلاس ایک ایسے مرحلے پر ہو رہا ہے جب پیر کی شام کو قومی اسمبلی کا اجلاس بھی ہے۔
وزیر اعظم کے مشیر رحمان ملک نے اراکین پارلیمان سے کہا کہ وہ اجلاس میں شرکت کے لیے دو متبادل راستے اختیار کریں کیوں کہ لانگ مارچ کی وجہ سے مرکزی شاہراہ بند ہوگی۔
رحمان ملک نے کہا کہ حکومت نے دفاع پاکستان کونسل کو اسلام آباد میں اجتماع کرنے کی اجازت دے رکھی ہے اور انھیں یہ حق ہے کہ وہ اسلام آباد میں اپنا احتجاج ریکارڈ درج کرائیں۔
ادھر بی بی سی کے نامہ نگار شہزاد ملک کے مطابق اتوار کی رات کو مشیرِ داخلہ نے اسلام آباد کے مختلف ناکوں کا اچانک ایک نجی گاڑی میں معائنہ کیا۔
اس موقع پر وہ پانچ مختلف مقامات پر سکیورٹی چیک پوائنٹ سے بغیر تلاشی کے گزرنے میں کامیاب ہو گئے جس کے بعد انہوں نے ناکوں کے انچارج سمیت نو اہلکاروں کو معطل کر دیا۔



















