Ukraine yataka wakazi waondolewe katika mji uliokombolewa

Chanzo cha picha, Getty Images
Ukraine imewaamuru baadhi ya wakazi kuondoka Kupiansk, wakati Urusi ikijaribu kuutwaa tena mji uliiouacha mwaka jana.
Mamlaka ya eneo la Kharkiv ilisema familia zilizo na watoto na watu "wenye uwezo wa kuhama" lazima waondoke kutokana na mashambulizi ya "mara kwa mara" ya vikosi vya Urusi.
Urusi iliuteka mji wa kaskazini-mashariki awali katika uvamizi kamili, na Ukraine iliupata tena mwezi Septemba.
Wakati huohuo, mamluki wa Urusi wanasema "wameuzingira" mji muhimu wa Bakhmut mashariki mwa Ukraine.
Maelezo hayo yalitolewa na Yevgeniy Prigozhin, ambaye anaongoza kikundi cha kijeshi cha Wagner.
Katika taarifa yake ya hivi karibuni, jeshi la Ukraine lilisema wanajeshi wa Urusi waliendelea na mashambulizi yao dhidi ya Bakhmut - lakini mashambulizi hayo "yalizuiwa".
Mapema wiki hii, Rais wa Ukraine Volodymyr Zelensky alikiri hali ilivyo Bakhmut - takriban kilomita 130 (maili 80) kusini-mashariki mwa Kupiansk - inazidi kuwa "ngumu zaidi na zaidi".
Huko Kupiansk, utawala wa kijeshi wa mkoa wa Kharkiv ulisema siku ya Alhamisi kuwa amri ya kuwahamisha ilitokana na "hali isiyo thabiti ya usalama" iliyosababishwa na makombora ya Urusi.
Ilisema waliohamishwa watapewa msaada, ikiwa ni pamoja na malazi, chakula, misaada ya kibinadamu na msaada wa matibabu.
Raia wengine pia waliruhusiwa kuondoka katika mkoa huo, iliongeza.
Kabla ya vita, Jiji lilikuwa na idadi ya watu karibu 25,000. Jeshi lilisema watoto 812 kwa sasa wamesajiliwa Kupiansk na wilaya inayozunguka, pamoja na walemavu 724.
Soma zaidi:
- Vita vya Ukraine: Jinsi Urusi ilivyochukua eneo la kusini na kisha kukwama
- Jinsi wakinamama walivyowanasua watoto wao kutoka kwenye uwanja wa vita












