Muhtasari: Habari kuu leo Jumanne
Miongoni mwa habari nyingine kuu leo, Trump ameanza kuangazia uchumi katika kampeni yake, Marekani imesikitishwa na mauaji ya walanguzi wa dawa Ufilipino.
1. Trump aanza kujikita katika uchumi

Chanzo cha picha, Getty Images
Mgombea wa urais kwa tiketi ya chama cha Republican Donald Trump amebadilisha mwelekeo wa kampeni yake hadi maswala ya kiuchumi baada ya wiki ya migogoro.
Akizungumza huko Detroit, ameahidi kuuchapua uchumi wa Marekani kupitia kuondoa kanuni mpya na kupunguza kodi kwa mashirika.
2. Ugomvi mwingine wazuka kuhusu Trump Republican

Chanzo cha picha, Getty Images
Wakati huo huo ugomvi umezuka kati ya Donald Trump na maafisa 50 wa usalama waliohudumu katika utawala wa rais wa zamani George Bush.
Maafisa hao walitoa taarifa wakisema kuwa Trump atakuwa rais asiyejali katika historia ya taifa hilo.
3. Marekani yasikitishwa na mauaji Ufilipino

Chanzo cha picha, EPA
Marekani imeeleza wasiwasi wake kuhusu ripoti kutoka Ufilipino kuhusu mauaji ya kiholela dhidi ya washukiwa wa dawa za kulevya yanayotekelezwa na polisi.
Polisi nchini Ufilipino wanasema kuwa wamewaua washukiwa 400 wa ulanguzi wa mihadarati katika kipindi cha miezi mitatu.
4. Jeshi Mexico laendelea na juhudi za uokoaji

Chanzo cha picha, AP
Wanajeshi wa Mexico na waokoaji wanatafuta watu waliotoweka kufuatia kimbunga Earl, ambacho kimesababisha maporomoko na kuwaua takriban watu wanne tangu Jumamosi.
Nyumba nyingi zilizikwa na matope katika jimbo la mashariki la Veracruz na eneo jirani la Puebla.
5. Chanzo cha kupungua kwa samaki Tanganyika

Chanzo cha picha, Getty Images
Utafiti mpya unasema kuwa kupanda kwa viwango vya joto katika kipindi cha karne moja iliopita ndio sababu ya kupungua kwa viwango vya samaki katika ziwa Tanganyika.
Ziwa hilo ni chanzo muhimu cha chakula miongoni mwa mamilioni ya raia wa Afrika Mashariki.
6. Brazil yashinda medali ya kwanza Brazil

Chanzo cha picha, BBC Sport
Brazil inasheherekea medali ya kwanza ya dhahabu katika michezo ya olimpiki ya Rio. Rafaela Silva alishinda katika mchezo wa judo uzani wa kilo 57.
Medali hiyo ya dhahabu inaonekana kuwa ufanisi mkubwa kwa mwanariadha aliyekulia katika mtaa maskini na wenye sifa mbaya zaidi.
7. Manchester United wamsajili Pogba

Chanzo cha picha, Getty Images
Na hatimaye klabu ya Manchester United imemsajili kiungo wa kati raia wa Ufaransa, Paul Pogba katika uhamisho unaodaiwa kuwa ghali zaidi.
Pogba amejiunga na klabu hiyo ya Uingereza kwa kitita cha dola milioni 150 kutoka Juventus.






























