सगरमाथा क्षेत्रमा अवतरण गर्न लागेका दुई हेलिकप्टर ठोक्किँदा 'एक भारतीय यात्रुको मृत्यु'

सगरमाथा आधारशिविरनजिकै रहेको फेरिचे गाउँमा अवतरण गर्न लागेका दुइटा हेलिकप्टरहरू ठोक्किँदा एक विदेशी नागरिकको मृत्यु भएको नेपाल नागरिक उड्डयन प्राधिकरणका सहप्रवक्ता ज्ञानेन्द्र भुलले बीबीसीलाई बताएका छन्।

सोलुखुम्बुका सहायक प्रमुख जिल्ला अधिकारी भुपेन्द्र थापाका अनुसार तामिलनाडु घर भएका भारतीय यात्रुको घटनास्थलमै मृत्यु भएको हो।

अधिकारीहरूका अनुसार उक्त दुर्घटनामा परी तीन जना घाइते भएका छन्। तीमध्ये एक जनाको काठमाण्डूमा र दुई जनाको लुक्लामा उपचार भइरहेको बताइएको छ।

प्राधिकरणका अनुसार दुर्घटनामा परेका हेलिकप्टरहरू फिश्टेल एअर र एअर डाइनेस्टीका हुन्।

सगरमाथा पदयात्रा मार्गमा पर्ने उक्त गाउँ समुद्री सतहभन्दा ४,००० मिटरभन्दा केही माथि पर्छ।

फिश्टेल एअरले एउटा विज्ञप्ति जारी गर्दै आफ्नो हेलिकप्टरमा सवार यात्रुको मृत्यु भएको परिचय खुलाएको छ।

उक्त कम्पनीले मृतकको उनको शव लुक्ला अस्पताल लगिएको र त्यहाँ आवश्यक प्रक्रिया अगाडि बढाउने काम भइरहेको जनाएको छ।

घाइतेहरू को हुन्

घाइतेहरूमध्ये एक जना विदेशी नागरिक र दुवै हेलिकप्टरका नेपाली पाइलट भएको सोलुखुम्बुका सहायक प्रमुख जिल्ला अधिकारी भुपेन्द्र थापाले बताए।

उनका अनुसार फिश्टेल एअरको हेलिकप्टरका पाइलटलाई उपचारका लागि काठमाण्डू लगिएको छ भने अर्का पाइलट र न्यूजीलन्डका नागरिकलाई हेलिकप्टरबाट लुक्ला लगिएको छ।

प्राधिकरणका अनुसार बिहान ८ः१५ बजेतिर उक्त दुर्घटना भएको थियो।

"लुक्लाबाट जाँदै गरेको र आधारशिविर नजिकैको गोरक्सेपबाट फर्कँदै गरेका हेलिकप्टरहरू एकैठाउँ अवतरण गर्न खोज्दा दुर्घटना भएको देखिन्छ," भुलले भने।

कसरी भयो दुर्घटना

दुर्घटनाको स्पष्ट कारण खुलिसकेको छैन। "त्यहाँ अन्य हेलिप्याड पनि भए पनि सायद हिउँले पुरिएका कारण एउटामै अवतरण गर्न खोजे कि भन्ने जस्तो देखिएको छ," भुलले भने।

सामाजिक सञ्जालमा प्रेषित एउटा भिडिओमा दुइटा हेलिकप्टर विपरीत दिशाबाट आएका र एउटाको पङ्खा अर्को हेलिकप्टरमा ठोक्किएको देखिन्छ।

बीबीसी न्यूज नेपालीले उक्त भिडिओको आधिकारिकता पुष्टि गरेको छैन। तर स्थानीय सञ्चारमाध्यमबाट पनि उक्त भिडिओ प्रसारित भएको छ।

दुर्घटना हुँदा दोस्रो हेलिकप्टरको पछाडिको भाग टुक्रिएको र अगाडिको भाग भुइँमा धसिएको देखिन्छ।

त्यसको ठिक अगाडि उभिएका केही मानिसहरू जोगिन भाग्दै गरेको पनि उक्त भिडिओमा देखिन्छ।

यतिखेर सगरमाथा क्षेत्रमा यतिखेर आमादब्लम हिमालमा आरोहण गर्ने क्रम चलिरहेको चलिरहेको छ। शरद्‌याम उक्त क्षेत्रमा पदयात्राका लागि समेत लोकप्रिय छ।

सगरमाथा आधारशिविरसम्म हेलिकप्टरमा पुग्दै बीचका गाउँमा छोटो समय 'ब्रेकफास्ट'का लागि रोकिने प्याकेजहरू समेत त्यस क्षेत्रमा चल्तीमा पाइन्छन्।

चिन्ता

एक उड्डयनविज्ञ कुमार चालिसेले मङ्गलवारको घटना स्पष्ट रूपमा अन्य कुरा भन्दा 'उडान संहिता'को जोडिने देखिने बताउँछन्।

"भिडिओ हेर्दा दुईवटा जहाज एकठाउँमा अवतरण गर्न आएको देखिन्छ। पाइलटहरूको तालिमको आधारभूत पाटोमै 'अगाडि, दायाँबायाँ भएका अवरोध हेर' भन्ने हुन्छ। तर दुवै क्याप्टेनले एकअर्कालाई हेरेका छैनन्," चालिसे भन्छन्।

"दुवै जना भुइँतर्फ अवतरण गर्ने ठाउँ मात्र हेरिरहेका छन्। आधराभूत नियम नै पालना नगर्नाले दुर्भाग्यपूर्ण परिस्थिति देखा पर्‍यो।"

उनले यस्ता घटनाको अर्थ देशको समग्र उड्डयन क्षमतासँग जोडिने र अन्तर्राष्ट्रिय प्रतिबन्ध खेपिरहेको नेपाललाई भविष्यमा अझ अप्ठ्यारो पर्ने अवस्था आउन सक्ने ठान्छन्।

त्यसैले यसको छानबिन नागरिक उड्डयन प्राधिकरणले गम्भीर रूपले गर्दै आवश्यक परे कठोर निर्णय लिन आवश्यक रहेको बताउँछन्।

"नागरिक उडान हो यो, कुनै युद्धको अवस्था होइन। उनीहरू दुवैलाई आसपासमा आफूहरू उडिरहेको थाहा छ। तर आधारभूत अनुसान पालना नगर्दाको नतिजा हो यो," चालिसे भन्छन्।

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।