Barca ba ta da tsayayyun masu cin kwallo, bayan Memphis a bana

An wallafa

Kungiyar Barcelona ita ce kan gaba mai 'yan wasa daban-dadan da ke ci mata kwallaye a La Liga ta bana.

Kawo yanzu 'yan wasan Barcelona 15 ne suka ci mata kwallo a kakar bana a babbar gasar Sifaniya.

Barcelona mai kwantan wasa ta yi nasarar doke Elche 3-2 ranar Asabar a Camp Nou a wasan mako na 18 a La Liga.

Ranar Asabar matasan 'yan wasan Barcelona, Jutgla da kuma Gavi suka ci Elche kwallaye da hakan ya sa suka shiga jerin 15 da ke ci wa kungiyar Camp Nou kwallaye a kakar bana.

Hakan ne ya sa Barcelona ke mataki na bakwai a kan teburi da maki 27, bayan nasara a karawa bakwai da canjaras shida da shan kashi a wasa hudu.

Kungiyar ta Camp Nou ta ci kwallo 28 aka zura mata 21 a raga a wasannin La Liga na shekarar nan.

Jumulla kwallo 30 Barcelona ta zura a raga 28 a La Liga da biyu a Champions League a dukkan fafatawa 23 da ta yi kawo yanzu a bana, kakar da take kamfar cin kwallaye kenan.

Memphis Depay ne kan gaba a cin kwallaye a La Liga mai takwas a raga bayan wasannin mako na 17 da kwantan wasa.

Sevilla da Real Madrid ne keda 'yan wasa 13 daban-daban da suka ci mata kwallaye a bana.

Ko a nahiyar Turai, kungiyar Chelsea da Hoffenheim ne ke kan gaba da 'yan wasa 16 daban-daban da suka ci musu kwallaye.

Wadanda suka ci wa Barcelona kwallaye a bana:

  • Memphis: kwallo 8
  • Ansu Fati: kwallo 4
  • Nico: kwallo 2
  • Pique: kwallo 2
  • Coutinho: kwallo 2
  • Braithwaite: kwallo 2
  • Sergi Roberto: kwallo 2
  • Gavi: kwallo 1
  • Agüero: kwallo 1
  • Abde: kwallo 1
  • Jutgla: kwallo 1
  • Araujo: kwallo 1
  • Frenkie de Jong: kwallo 1
  • Busquets: kwallo 1
  • Luuk de Jong: kwallo 1