Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Saura maki uku tsakanin City da Liverpool
Manchester City ta yi nasarar doke Arsenal da ci 3-1 a wasan mako na 25 a gasar cin kofin Premier da suka kara a Ettihad a ranar Lahadi.
City ta ci kwallayen ne ta hannun Sergio Aguero wanda ya ci uku rigis, kuma karo na 10 da ya yi wannan bajintar a Premier, Alan Sherer ne ke kan gaba da 11 a tarihi.
Arsenal ta zare kwallo daya ta hannu Laurent Koscielny tun a minti na 11 da fara tamaula.
Da wannan sakamakon City ta koma ta biyu da tazarar maki uku tsakaninta da Liverpool ta daya a kan teburi mai maki 62.
Arsenal kuwa ta koma ta shida a teburi, bayan da United ta doke Leicester City a ranar Lahadi ta koma ta biyar da tazarar maki biyu tsakaninta da Chelsea ta hudu mai maki 50.
A ranar Litinin ne West Ham United da Liverpool suka tashi 1-1 a karshen wasan mako na 25 a gasar ta cin kofin Premier.