آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
دارجیلنگ میں پر تشدد مظاہرے جاری، ایک شخص ہلاک
انڈیا کی ریاست مغربی بنگال کے شہر دارجیلنگ میں ہونے والی تشدد کی تازہ وارداتوں کے بعد پولیس فائرنگ میں ایک شخص کی ہلاکت کی اطلاع ہے۔
گورکھا نیشنل لبریشن فرنٹ نے اس خبر کی تصدیق کرتے ہوئے کہا ہے کہ ان کے ایک حامی کو گولی مار دی گئی ہے، جو کچھ ادویات خرید اپنے گھر واپس آ رہا تھا۔
بتایا گیا ہے کہ پولیس کی جانب سے فائرنگ کا واقعہ اس وقت پیش آیا جب مظاہرین نے شہر میں آتش زنی کی اور ایک پولیس سٹیشن میں بھی آگ لگا دی۔
اطلاعات کے مطابق سنیچر کی صبح ہونے والے مظاہروں میں ہجوم نے دارجیلنگ کی مقبول کھلونا ٹرین کے ایک اسٹیشن میں بھی آگ لگا دی ہے۔
مظاہرین نے پولیس کی گاڑیوں میں بھی توڑ پھوڑ کی ہے۔ سنیچر کو پورے دارجیلنگ شہر میں مظاہرے ہوئے۔
پولیس کا دعوی ہے کہ بھیڑ کو قابو کرنے کے لئے پہلے آنسو گیس کے گولے چھوڑے گئے اور ربڑ کی گولیاں چلائی گئیں۔ اس کے بعد ہی فائرنگ کی گئی۔
مقامی لوگوں کا کہنا ہے کہ پولیس فائرنگ میں ایک اور شخص کی بھی ہلاکت ہوئی ہے۔ تاہم پولیس نے اس خبر کی تصدیق نہیں کی ہے۔
صورت حال کو کنٹرول کرنے کے لیے فوج کو ایک بار پھر دارجلنگ بلائے جانے کا امکان ہے۔
End of سب سے زیادہ پڑھی جانے والی
وہیں ریاست کی وزیر اعلی ممتا بنرجی نے کہا ہے کہ معاملے کی تحقیقات شروع ہو گئی ہیں کہ سونادا میں یہ ہلاکت کیسے ہوئی اور اس معاملے میں اگر کوئی مجرم پایا گیا، تو اسے سزا دی جائے گی۔
ممتا بنرجی نے مزید کہا کہ ’گورکھا جن مکتی مورچہ کے لیڈر تشدد کا راستہ چھوڑ دیں۔ ہڑتال ختم کریں اور کھانے پینے کا سامان دارجلنگ تک پہنچنے دیں۔‘
انھوں نے الزام لگایا ہے کہ دارجیلنگ میں مرکزی سیکورٹی فورسز کی جتنی تعداد مانگی گئی تھی، وہ مرکزی حکومت نے نہیں بھیجی ہیں۔
یاد رہ کہ دارجیلنگ میں ایک مقامی جماعت نیپالی زبان بولنے والی گورکھا کمیونٹی کے لیے الگ ریاست بنانے کا مطالبہ کر رہی ہے۔ یہ مظاہرے مغربی بنگال کی حکومت کی جانب سے ریاست بھر کے سکولوں بشمول دارجیلنگ میں بنگالی کو لازمی مضمون قرار دیے جانے کے بعد شروع ہوئے۔
دارجیلنگ میں جاری اس ہڑتال نے شہر میں پبلک ٹرانسپورٹ کے نظام کو شدید متاثر کیا ہے جس سے ہزاروں مقامی افراد کو مشکلات کا سامنا ہے۔
دارجیلنگ میں گذشتہ ماہ مظاہرین سے نمٹنے کے لیے فوج کو پولیس کی مدد کے لیے طلب کیا گیا۔ ان پرتشدد مظاہروں میں کم سے کم پانچ افراد ہلاک اور 100 سے زیادہ افراد زخمی ہو گئے تھے۔ زخمی ہونے والوں میں 30 پولیس اہلکار بھی شامل تھے۔
دارجیلنگ کو علحیدہ ریاست بنانے کے لیے سنہ 1980 کی دہائی میں مظاہرے ہوئے تھے جن میں 1,200 سے زیادہ افراد مارے گئے تھے۔ یہ مظاہرے اس وقت ختم ہوئے جب گورکھا رہنما نے الگ ریاست کے مطالبے کی بجائے خود مختار کونسل پر رضامندی ظاہر کی جس میں علاقے کی خود مختاری کی ضمانت دی گئی تھی۔