Galw am weld datganoli cyfrifoldeb am adeiladau a chytundebau Remploy
- Cyhoeddwyd

Mae Llywodraeth Cymru wedi sefydlu cronfa i gynorthwyo gweithwyr Remploy
Mae Llywodraeth Cymru eisiau i'r cyfrifoldeb am adeiladau, tir a chytundebau dwy ffatri ola Remploy yng Nghymru gael ei ddatganoli i Gymru er mwyn creu mentrau cymdeithasol ar y safleoedd hynny.
Ddydd Iau fe wnaeth Llywodraeth San Steffan gyhoeddi bod y ddwy ffatri dan fygythiad.
Y ddwy ffatri yw'r rhai yn Y Porth, y Rhondda, a Baglan ger Port Talbot.
Mae dros 140 o weithwyr yno yn wynebu diswyddiadau gorfodol.
Mae Llywodraeth Cymru hefyd wedi dweud y byddan nhw'n darparu cymorth i gynweithwyr.
"Rydan ni wedi sefydlu cronfa i helpu pobl i sicrhau bod gweithwyr anabl yn gallu gweithio yn y dyfodol," meddai Leighton Andrews, Gweinidog Addysg a Dysgu Gydol Oes.
Effeithiolrwydd
Eisoes mae dros 270 o swyddi Remploy wedi mynd yng Nghymru eleni ar ôl i chwech o safleoedd gau.
Garry Owen yn holi Alex Morgan, un o weithwyr Remploy Baglan
Mae'r frwydr i gadw drysau ffatrioedd Remploy yng Nghymru ar agor wedi bod yn un danbaid yn ystod y 12 mis diwethaf.
Ond mae llywodraeth Prydain yn mynnu bod modd defnyddio'r arian yn fwy effeithiol i gyflogi pobl anabl yn y gweithle.
Dywedodd Alex Morgan sy'n gweithio yn y safle ym Maglan, bod hi'n ddiwrnod trist iawn ar ôl clywed y newyddion ddydd Iau.
"Roedden ni'n erfyn y cyhoeddiad ond wedi meddwl mai ar ôl y Nadolig fyddai'r cyhoeddiad yn dod.
"Doedd 'na ddim rhybudd o gwbl.
"Lan i fis yn ôl roedden ni'n brysur a lot o waith i'w wneud.
"Mae pobl yn becso am y dyfodol, fi moyn profi fy hunan, mond cael y profiad."
Straeon perthnasol
- Cyhoeddwyd6 Rhagfyr 2012

- Cyhoeddwyd18 Medi 2012

- Cyhoeddwyd16 Awst 2012

- Cyhoeddwyd8 Mawrth 2012

- Cyhoeddwyd7 Mawrth 2012
