Seirbheisean aiseig a bharrachd a nì cinnteach gum faigh eileanaich cùram NHS

Tha Caledonian Mac a' Bhriuthainn a' cur air dòigh seòlaidhean a bharrachd eadar Loch nam Madadh is an Tairbeart airson dèanamh cinnteach gum faigh euslaintich cùram meidigeach an Steòrnabhagh.

Tha clàr-ama eadar-amail gu bhith aig an MV Hebrides eadar 12mh den t-Samhain agus 22na den Dùbhlachd, le seòlaidhean a bharrachd Dimàirt agus Diaordaoin, le uairean seòlaidh diofraichte Diciadain agus Dihaoine.

'S e as coireach ris na h-atharrachaidhean gur e an MV Loch Bhrusda seach an soitheach àbhaisteach, an MV Loch Portain, a tha a' frithealadh slighe Caolas na Hearadh an-dràsta agus cha ghabh i sin na h-uimhir de luchd-siubhail.

Tha Manaidsear Sgìreal ChalMac airson Innse Gall a Tuath, Fiona Galbraith, ag ràdh gu bheil e mar phrìomhachas dhaibh taic a chumail ri daoine a tha a' siubhail air adhbharan cùram slàinte.

Thuirt i: "Chan urrainn dhuinn coinneachadh ris an iarrtas airson siubhal euslainteach air seirbheis Caolas na Hearadh agus tha sinn airson 's gum bi earbsa aig daoine a dh'fheumas siubhal."

Fàgaidh an clàr-ama ùr Dimàirt agus Diaordain gum bi e nas anmoiche mus ruig daoine tìr-mòr, agus thuirt CalMac gum biodh iad ag obair le luchd-cleachdaidh coimeirsealta feuch a' bhuaidh a bhios orra a lùghdachadh.

Foillsichidh a' chompanaidh fhathast mar a chumas iad taic ri siubhail euslainteach agus dhaoine eile eadar deireadh na bliadhna seo agus toiseach 2027, nuair 's e an MV Glen Sannox a bhios a' dol eadar Ùige, Loch nam Madadh agus an Tairbeart.

Bidh an MV Hebrides a' dol gu deas airson seirbheisean a chumail ri Colla, Tiriodh agus Colbhasa fhad 's a bhios an MV Clansman a' faighinn na seirbheis bliadhnail aice.