Висконсин штатындагы Брукфильд шаарында сулуулук салонунда чыр-чатактын айынан ок атылып, үч адам мерт болуп, төртөө жарадар болду.
Полиция окуя болгон жерди курчап, кылмышты иликтөөнү баштады.
Полицейлер бул кылмышка 45 жаштагы Рэдклифф Хотонду күнөлүү деп шектеп жатышат. Ал өзүн өзү атып өлтүрүп, сөөгү табылганы айтылууда.
Сулуулук салонунда куралчан киши жүрөт деген кабар жетер менен бул жакка толтура полицейлер келди. Инцидент ички чыр-чатактан улам чыккан деп айтылууда.
Полиция адегенде жасалма жардыргыч зат табылганын айтып жаткан, бирок кийин бул маалымат туура эмес болуп чыкты.
Ак үйдүн администрациясы тараткан билдирүүдө Барак жана Мишель Обама бул атышуунун курмандыктары жөнүндө кайгырып, алардын үй-бүлөсүнө кайрат сөздөрүн билдирип жатканы айтылат.
Бул Висконсин штатында быйыл экинчи жолу болуп жаткан массалык киши атуу окуясы.
Августта АКШ армиясынын ардагери Уэйд Майкл сикхтердин храмында аткан октон алты адам курман болгон.




