Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Da kyar da gumin goshi Chelsea ta ci Cardiff
Chelsea ta hada maki uku rigis ranar Lahadi, bayan da ta je ta doke Cardiff City 2-1 a wasan mako na 32 a gasar cin kofin Premier da suka fafata a Cardiff Stadium.
Cardiff ce ta fara cin kwallo ta hannun Victor Camarasa, saura minti biyar a tashi daga wasan ne Chelsea ta farke ta hannun Cesar Azpilicueta.
Kuma daf da za a tashi daga karawar Chelsea ta kara na biyu ta hannun Ruben Loftus-Cheek.
Da wannan sakamakon Chelsea tana nan a matakinta na biyar a kan teburi da maki 60 daidai da wanda Arsenal take da shi wadda za ta fafata da Newcastle United ranar Litinin.
Cardiff City tana ta 18 a kasan teburin Premier da maki 18 da tazarar maki daya tsakaninta da Fulham ta 11 sannan maki biyar tsakaninta da Burnley ta 17 a teburi.
Chelsea za ta buga kwantan wasanta da Brighton & Hove Albion ranar 3 ga watan Afirilu, karawar da ya kamata su yi tun 24 ga watan Fabrairu gasar mako na 27 a wasannin Premier.
Wasannin mako na 33 da za a buga:
Talata 2 Afirilu 2019
- Watfordda Fulham FC
- Wolverhampton Wanderers da Manchester United
Laraba 3 Afirilu 2019
- Manchester City da Cardiff City
- Tottenham da Crystal Palace Kwantan wasan mako na 31
Juma'a 5 Afirilu 2019
- Southampton da Liverpool
Asabar 6 Afirilu 2019
- Newcastle United da Crystal Palace FC
- Huddersfield Town da Leicester City
- Bournemouth da Burnley FC
Lahadi 7 Afirilu 2019
- Everton da Arsenal FC