Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Buhari ya jinjinawa 'yan Paralympic din kasar
Shugaban Nigeria Muhammadu Buhari ya yabawa 'yan wasan Paralympic din kasar kan rawar da suka taka a gasar da aka kammala a birnin Rio na Brazil.
A sanarwar da gwamnati ta fitar a ranar Litinin, shugaba Buhari ya ce masoya wasanni sun jinjinawa 'yan Nigeria na kara martaba kasar da suka yi a Brazil.
Buhari ya kuma yaba da yadda 'yan wasan suka ci lambobin yabo 12, da kafa tarihi a wasan jifan dalma, da yadda suka yi na daya a Afirka a cin lambobin yabo a wasannin da aka kammala a ranar Lahadi.
Haka kuma shugaban ya jinjinawa mahukunta da wadanda suka horar da 'yan wasan da duk wadan da suka bayar da gudummawar wajen daga martabar kasar.