Europa League: An hada Arsenal da CSKA Moscow

Asalin hoton, Getty Images
Arsenal za ta hadu da CSKA Moscow ta Rasha a gasar zakarun Turai ta Europa League zagayen daf da na kusa da karshe
Arsenal ce za ta fara karbar bakuncin fafatawar a Emirates a ranar 5 ga Afrilu, kafin mako na gaba ta kai wa CSKA ziyara a Moscow.
Atletico Madrid ta biyu a teburin La liga za ta hadu ne da Sporting Lisbon ta Portugal.
RB Leipzig ta Jamus za ta hadu ne da Marseille, yayin da kuma aka hada Lazio ta Italiya da Salzburg ta Austria.
Arsenal dai ta tsallake ne bayan ta casa AC Milan da jimillar kwallaye 5-1 a fafatawar da suka yi gida da waje.
Wannan ne kuma karon farko da Arsenal ta kai zagayen daf da na kusa da karshe a gasar zakarun Turai tun 2010.
Yanzu kuma babban kalubalen Arsenal shi ne lashe kofin gasar domin samun gurbi a gasar zakarun Turai a kaka ta gaba.
Maki 12 ne tsakanin Arsenal da matsayi na hudu a teburin Premier.
Sauran kungiyoyin da aka hada:
RB Leipzig da Marseille
Arsenal da CSKA Moscow
Atletico Madrid da Sporting Lisbon
Lazio da Red Bull Salzburg


























