Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Manchester City ta lashe Community Shield
Manchester City za ta fara kakar tamaula ta bana da kafar dama bayan da ta lashe Community Shield ranar Lahadi a Wembley.
City ta yi nasarar doke Liverpool a bugun fenarity da ci 5-4, bayan da suka tashi wasan kunnen doki 1-1.
Man City ce ta fara cin kwallo ta hannun Raheem Sterling minti 12 da fara tamaula, daga baya Liverpool ta farke saura minti 12 a tashi daga karawar ta hannun Joel Matip.
Bayan kammala Community Shield na nufin karshen makon nan za a fara gasar cin kofin Premier na bana, wanda Manchester City ta lashe na bara.
Haka kuma City din ita ce ta yi nasarar daukar kofin FA da na League Cup a kakar da aka kammala.
Jadawalin wasan farko a gasar Premier
Juma'a 9 ga watan Agusta
- Liverpool da Norwich City
Asabar 10 ga watan Agusta
- West Ham United da Manchester City
- Watford da Brighton & Hove Albion
- Burnley da Southampton
- Crystal Palace da Everton
- Bournemouth da Sheffield United
- Tottenham da Aston Villa
Lahadi 11 ga watan Agusta
- Newcastle United da Arsenal
- Leicester City da Wolverhampton Wanderers
- Manchester United da Chelsea
Karin wasu bayanai
- Manchester City ta lashe Community Shield na shida a tarihi kuma ta farko da ta dauka biyu a jere, tun bayan bajintar da Arsenal ta yi a Agustan 2015.
- Haka kuma City ita c e ta farko da ta lashe Community Shield, bayan cin kofin Premier dana FA, tun bayan Arsenal da ta yi hakan a Agustan 2002, inda ta ci Liverpool 1-0.
- Idan ka hada da bugun fenarity, Manchester United da Chelsea ne aka fi doke wa a karawar karshe kowacce sau tara-tara a Community Shield, sai Liverpool mai bakwai iri daya da Arsenal.
- Kwallon da Raheem Sterling ya ci Liverpool ranar Lahadi, ita ce ta farko da ya zura wa tsohuwar kungiyarsa a karawa 11 da ya yi da ita a kowacce fafatawa.