Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Joseph Kabila na son yin tazarce ba tare da zabe ba
Ana zaman dar-dar a jamhuriyar Dimokradiyyar Congo bisa tsoron barkewar sabon rikici a ranar Litinin, ranar da wa'adin shugaban kasar, Joseph Kabila yake karewa.
An dai tashi baram-baram daga tattaunawa tsakanin bangaren gwamnati da jam'iyyun adawa, bayan da shugaba Kabila, ya nemi ya zarce da mulkin kasar tunda dai ba a yi zaben da zai ba wa wani ikon karbar sa ba.
Ana tsammanin cewa za a iya samun barkewar zanga-zanga a ranar Litinin din daga bangaren jam'iyyun adawar kasar bisa abin da suka kira shirin shugaba Kabila na cigaba da mulki.
A daren Lahadi ne aka kakkafa wuraren bincike na sojoji da 'yan sanda a ciki da wajen babban birnin kasar, Kinshasa.
Kuma gwamnati ta ce za ta toshe kafafen sadarwa na sada zumunta da kuma yin dirar mikiya kan masu zanga-zanga.
A watan Satumbar da ya gabata dai an kashe masu zanga-zanga fiye da 50, a kasar.
Tun dai shekarar 2001 Mista Kabila yake mulki a kasar.
Ya hau mulkin ne kwanaki goma bayan kisan gillar da aka yi wa mahaifinsa, shugaba Laurent-Désiré Kabila.