Umukuru w'igipolisi ca Catalogne muri sentare i Madrid

Police chief Trapero (second from L) arrives at court, 6 Oct 17
Insiguro y'isanamu, Umukuru w'igipolisi Trapero (uwa kabiri uvuye mu bubamfu) ashitse i Madrid muri sentare ari kumwe n'abandi bakorana
Yatangajwe

Umukuru w'igipolisi ca Catalogne, Josep Lluis Trapero, yitavye umucamanza i Madrid yikekwa ko ashigikiye abashaka kwiyonkora kuri Espagne.

Igipilisi arongoye cagirizwa ko ata co cakoze ngo gikingire igipolisi c'igihugu mu mishamirano yabahuje n'abari mu myiyerekano imbere y'uko haba amatora ya kamarampaka itariki imwe z'ukwezi kwa cumi.

Uwundi mutegetsi mu gipolisi hamwe n'abandi bantu babiri baharanira ukwikukira kwa Catalogne na bo nyene bari mu babazwa.

Amatora ya kamarampaka ya Catalogne yo ku musi w'Imana ngo nta co avuze hisunzwe amategeko ya Espagne.

Urwo rubanza ruriko rurabera muri sentare rubamba i Madrid.

Abahamagajwe bagirizwa kudafasha igipolisi c'igihugu kubuza ibihumbi n'ibihumbi vy'abashigikiye ukwikukira kwa Catalogne kuja mu myiyerekano hanze y'igisata kijejwe ubutunzi ca Catalogne i Barcelone itariki 20 z'ukwezi kw'icenda.

Ikinyamakuru gikomeye ca El Pais kivuga ko ivyagirizwa igipolisi ca Catalogne ari ibintu bidasanzwe mu kiringo c'inyuma y'intwaro y'umukazo ya Franco.

Mossos chief Josep Luis Trapero, file pic
Insiguro y'isanamu, Trapero: Igipolisi arongoye carashimagijwe mu kugwanya iterabwoba i Barcelone

Icaha co kwiyonkora kiri mategeko mpanavyaha yose kuva mu 1822 kikaba gishobora guhanishwa igipfungo c'imyaka 15.

Gisa n'ico gutera igihugu canke kugeramira abajejwe umutekano.

Mu misi ya vuba cane, nko mu kwezi kw'umunani, igipolisi ca Catalogne cari cashimagijwe ku kungene cari catujije iterabwoba inyuma y'ibitero vy'i Barcelone muri uko kwezi.