'Mae mor bwysig sicrhau llu dwyieithog'
Mae hyfforddiant cyfrwng Cymraeg i swyddogion newydd dan hyfforddiant wedi cychwyn ym mhencadlys Heddlu Dyfed Powys.
Am y tro cyntaf, bydd recriwtiaid yn medru manteisio ar y cyfle i wneud eu hyfforddiant trwy gyfrwng y Gymraeg.
Yn ôl Prif Gwnstabl Heddlu Dyfed Powys, mae siaradwyr Cymraeg wedi bod yn "rhy fodlon dros y blynyddoedd i dderbyn gwasanaeth trwy gyfrwng y Saesneg".
Awgrymodd Dr Richard Lewis hefyd fod y cyhoedd yn gallu bod yn fwy parod i rannu gwybodaeth gyda swyddogion sy'n siarad Cymraeg.
Ychwanegodd mai nod y cynllun yw sicrhau bod y llu yn datblygu i fod yn "hollol ddwyieithog".