Tri wedi eu hanafu mewn gwrthdrawiad yn Sir Gaerfyrddin
- Cyhoeddwyd
Bu'r gwasanaethau brys yn gweithio am dros ddwy awr i dorri pobl yn rhydd o'r cerbydau
Cafodd tri o bobl eu cludo i'r ysbyty yn dilyn gwrthdrawiad difrifol rhwng pedwar cerbyd yn Sir Gaerfyrddin nos Fawrth.
Yn ôl Gwasanaeth Tân ac Achub y De a'r Canolbarth fe wnaeth pedwar car daro yn erbyn ei gilydd ar ffordd yr A476 rhwng Llanon a Tymbl Uchaf i'r gogledd o Lanelli am 18:20.
Dywedodd y Gwasanaeth Tân ac Achub bod un car wedi troi ar ei ochr a bod pobl yn gaeth mewn tri o'r cerbydau.
Bu'r gwasanaethau brys yn gweithio am dros ddwy awr i dorri pobl yn rhydd.
Cafodd tri o bobl eu cludo i Ysbyty Glangwili yng Nghaerfyrddin i gael triniaeth bellach.
Roedd y ffordd yn parhau ar gau nos Fawrth wrth i'r gwasanaethau brys ymchwilio i'r digwyddiad.
