Sgandal gwaed: Profiad teulu gafodd eu heffeithio
Yn yr 1970au a'r 80au cafodd cannoedd o gleifion yng Nghymru a miloedd ar draws y DU eu heintio ar ôl iddyn nhw dderbyn gwaed a chynnyrch gwaed oedd ddim yn ddiogel.
Roedd Christopher John Thomas o Bwllheli yn byw gyda'r cyflwr hemoffilia, cyflwr lle nad yw'r gwaed yn ceulo yn iawn - ond roedd yn byw bywyd llawn.
Weithiau byddai'n gorfod mynd i'r ysbyty a threulio amser yno i reoli'r gwaedu pan fyddai'n cael anaf.
Ond fe newidiodd pethau pan ddechreuodd triniaeth newydd oedd yn cynnwys y gweithredydd ceulo gwaed Ffactor VIII.
Roedd y driniaeth yn cynnwys elfen oedd yn cynyddu gallu'r gwaed i geulo - triniaeth chwyldroadol ar y pryd oedd yn cynnig gobaith newydd i ddioddefwyr.
Ar y pryd roedd Ffactor VIII yn cael ei gynhyrchu drwy grynhoi gwaed o filoedd o roddwyr gyda llawer yn cael ei fewnforio o'r UDA a gwledydd eraill.
Yr hyn ddaeth yn amlwg wedyn oedd bod y gwaed wedi cael ei gasglu o ffynonellau nad oedd yn ddiogel - yn cynnwys gan garcharorion gafodd eu talu.
Rachel, merch Christopher, sy'n adrodd hanes ei thad.