Mam wedi lladd ei merch 'oherwydd seicosis difrifol'

  • Cyhoeddwyd
Carly Ann HarrisFfynhonnell y llun, Wales News Service
Disgrifiad o’r llun,

Clywodd y llys bod Carly Ann Harris yn dioddef gyda phroblemau iechyd meddwl ar y pryd

Mae llys wedi clywed bod mam o Rondda Cynon Taf yn dioddef o seicosis difrifol pan wnaeth hi foddi ei merch yn y bath yn eu cartref.

Mae Carly Ann Harris, 38, yn gwadu llofruddiaeth a dynladdiad ei merch pedair oed, Amelia, gan ddweud nad oedd hi yn ei iawn bwyll ar y pryd.

Clywodd Llys y Goron bod Ms Harris yn credu y byddai lladd ei merch yn achub dynolryw.

Dywedodd y seicolegydd clinigol Dr Arden Tomison bod Ms Harris yn credu ar y pryd ei bod yn gwneud y peth iawn.

Bydd rhaid i'r rheithgor benderfynu a ydy Ms Harris yn ddieuog o lofruddiaeth oherwydd gwallgofrwydd, neu'n euog o ddynladdiad am nad oedd hi yn ei iawn bwyll.

Clywodd y rheithgor bod y diffynnydd wedi dechrau datblygu symptomau seicotig ar ddiwedd 2017, a bod hynny wedi troi'n salwch seicotig difrifol erbyn Pasg eleni.

Amelia Brooke HarrisFfynhonnell y llun, Llun teulu
Disgrifiad o’r llun,

Roedd Amelia Brooke Harris yn bedair oed pan fu farw

Ar ôl boddi Amelia yn y bath fe wnaeth Ms Harris gymryd corff ei merch i'r ardd a'i roi ar dân.

Dywedwyd wrth y llys bod y ddwy weithred yma'n cyd-fynd â chredoau yn yr Hen Destament sy'n helpu'r broses o fynd i'r nefoedd.

Dywedodd Dr Tomison wrth y rheithgor: "Roedd hi'n siŵr yn ei meddwl bod angen gwneud hyn yn ôl gorchymyn Duw."

Clywodd y llys hefyd, wedi i Ms Harris gael ei arestio, ei bod yn ymddangos wedi drysu ynglŷn â pham roedd hi yn y carchar.

Mae'r achos yn parhau.

Straeon perthnasol