6 Gwlad: Pwyntiau bonws, rheolau taclo, a thaith y Llewod
- Cyhoeddwyd

Mae Pencampwriaeth y Chwe Gwlad yn ôl, a gohebydd chwaraeon BBC Cymru, Cennydd Davies sydd wedi bod yn edrych ymlaen.

Pwyntiau bonws, rheolau taclo llym a thaith y Llewod ar y gorwel. Ydy, mae Pencampwriaeth y Chwe Gwlad eleni'n argoeli i fod yn hynod ddiddorol.
Mae naws arbennig Pencampwriaeth y Chwe Gwlad yn ôl, y teimlad 'na sy'n atgoffa rhywun o'ch plentyntod ar noswyl Nadolig.
Mae 'na gyffro, mae 'na gryn edrych ymlaen, a beth bynnag sy' 'di digwydd yn y gorffennol, mae'n lechen lan i bawb.
Yw'r gystadleuaeth eleni'n wahanol?
Wel chi'n siwr o glywed y frawddeg sy'n cael ei hadrodd pob blwyddyn: "Y gystadleuaeth fwya' clos ers blynyddoedd."
Amser a ddengys, ond mae 'na ddau dîm sy'n ymddangos ben ac ysgwyddau'n uwch na'r lleill ar hyn o bryd, wedi i Iwerddon lorio grym y Crysau Duon yn yr Hydref, a'r Saeson o dan Eddie Jones yn parhau i 'sgubo pawb o'r neilltu - mwy am hynny y man.

Wedi buddugoliaeth hanesyddol dros y Crysau Duon llynedd, ai'r Gwyddelod fydd ar y brig eleni?
Ma na sawl is-destun serch hynny i ychwanegu at y cyffro eleni, am y tro cyntaf bydd arbrawf pwyntiau bonws i annog chwarae creadigol, deiniadol a rygbi 15 dyn.
A felly gallwn ni ddisgwyl i Gymru ddiosg yr hen arddull undonog corfforol - Warrenball - wrth i'r arddull newydd yma esblygu. Ond ar sail yr hydref dwi'n dal i ddisgwyl!
Mae'r rheolau taclo newydd ddaeth i rym ar ddechrau'r flwyddyn wedi bod yn bwnc dadleuol a di-drugaredd, a gallwch chi ddisgwyl trafodaethaethau lu ynglŷn â "chardie' melyn yn troi gêm".
DISGYBLAETH, DISGYBLAETH, DISGBYLAETH fydd y gri gan yr hyfforddwyr.
Taith y Llewod i Seland Newydd
Mae'r mater bach o daith y Llewod ym mis Mehefin yn gymhelliad pellach, a sôn am gymhelliad, doedd dim un Cymro yn nhîm dychmygol cyn ganolwr Lloegr, Will Greenwood wrth drafod y Llewod yn ddiweddar.

Allai Lloegr sicrhau'r Gamp Lawn am ail flwyddyn yn olynol dan Eddie Jones?
Ond na phoener, bedair blynedd yn ôl roedd Cymru eto o dan hyfforddiant Rob Howley ac yn dechrau ymgyrch wedi colli pob un o gemau'r Hydref.
Collwyd y gêm agoriadol yn erbyn y Gwyddelod cyn mynd ymlaen i ennill pob un o'r gemau nesaf, a'r bencampwriaeth.
A chanlyniad hynny? 10 o Gymry'n dechrau'r prawf ola' buddugoliaethus yn Awstralia. Ydy mae'r sefyllfa'n gallu newid yn gloi!
Mae'r aros bron ar ben!
Gallwch ddilyn Cymru v Yr Eidal ar lif byw arbennig Cymru Fyw o 13:30 ddydd Sul.
Straeon perthnasol
- Cyhoeddwyd2 Chwefror 2017

- Cyhoeddwyd17 Ionawr 2017
