AC yn galw am wrthod cynllun pensiwn Tata
- Cyhoeddwyd

Gwaith Port Talbot yw ffatri fwyaf Tata, gan gyflogi mwy na 4,000 o weithwyr
Mae yna alwad wedi ei wneud ar i weithwyr dur Tata wrthod cynllun pensiwn sy'n cael ei gynnig gan y cwmni oherwydd ei fod yn "annerbyniol".
Fe fydd y gweithwyr yn pleidleisio ar y cynnig, sy'n cynnwys diogelu swyddi a'r safle cynhyrchu ym Mhort Talbot, yn ddiweddarach yn y mis.
Ar raglen Sunday Supplement BBC Radio Wales dywedodd Adam Price, llefarydd Plaid Cymru ar yr Economi, y dylai'r gweithwyr alw ar y cwmni i ailystyried.
Fe ddywedodd llefarydd ar ran Tata y byddai'n amhriodol iddyn nhw wneud sylw tra'i bod nhw mewn cyfnod o ymgynghori.
Yn y gorffennol maen nhw wedi disgrifio'r cynllun fel un "hanfodol."
Elw
Mae'r undebau wedi dweud na fyddant yn gwneud argymhelliad i weithwyr p'run ai i dderbyn y cynnig neu ei wrthod.
Dywedodd Mr Price, AC Dwyrain Caerfyrddin a Dinefwr: "Mae'r hinsawdd economaidd mae'r diwydiant dur yn ei wynebu yn 2017 wedi ei drawsnewid yn llwyr.
"Mae'r arolwg tymor-canol wedi gwella, ac mae safle Port Talbot yn gwneud elw," meddai.
"Yn y cyd-destun hwn, dyw hi ddim yn bendant y bydd gweithwyr dur Tata yn derbyn y cynnig pensiwn, pan fydd yna bleidlais yn cael ei chynnal gan yr undebau yn ddiweddarach y mis hwn."

Mae Adam Price yn dweud y dylai'r gweithwyr alw ar Tata i ailystyried eu cynnig
Mae Mr Price yn honni fod y cwmni yn "defnyddio digwyddiadau dros y 12 mis diwethaf i roi pwysau ar y gweithwyr".
"Yn fy marn i, byddai'n beth doeth i weithwyr ofyn i'r cwmni ailfeddwl, ac i ddod yn ôl i'r bwrdd trafod gydag addewid pendant yn nhermau cyflogaeth a buddsoddiad," meddai.
"Mae e hefyd yn anodd credu y gallai cwmni mor fawr a phwerus gael yr hawl i gefnu ar ei gyfrifoldebau pensiwn presennol.
"Pe na bai Tata yn barod i wneud hyn, yna dylid gwladoli'r cwmni dros dro, gan ailagor trafodaethau gyda'r cwmnïau oedd wedi dangos diddordeb mewn prynu'r safleoedd."
'Colledion sylweddol'
Mae Tata yn cyflogi bron i 7,000 yng Nghymru, gan gynnwys dros 4,000 ym Mhot Talbot.
Dywed y cwmni fod angen newidiadau cyn y bydd yn ymrwymo i becyn buddsoddi newydd i Bort Talbot fyddai'n golygu buddsoddi £1bn dros 10 mlynedd.
Mae addewid hefyd i gadw dwy ffwrnes ar y safle am bum mlynedd, ac i geisio osgoi diswyddiadau gorfodol dros yr un cyfnod.
Dywedodd llefarydd ar ran y Pwyllgor Dur, pwyllgor sy'n cynrychioli'r holl undebau dur: "Tra'n parchu barn Mr Price, mae'n bwysig bod y gweithlu yn deall y cynigion y byddant yn ystyried ddiwedd y mis.
"Ar hyn o bryd mae Swyddfa Bensiynau yn cynnal nifer o weithdai pensiwn, ac yn mynd i'r gwahanol safleoedd er mwyn egluro i'r gweithwyr y sefyllfa bresennol o ran y cynllun pensiwn, a'r cynllun pensiwn newydd sy'n cael ei gynnig."
Ychwanegodd fod trafodaethau rhwng yr undebau a'r cwmni hefyd wedi canolbwyntio ar sicrhau parhad y gwaith cynhyrchu dur ym Mhort Talbot, a gweddill safleoedd Tata yn y DU,
Fis Mawrth y llynedd dywedodd Tata y byddai'n rhaid gwerthu eu safleoedd dur yn y DU oherwydd bod y cwmni yn gwneud colledion sylweddol
Ar y pryd dywedodd y cwmni mai un o'r pethau anodd wrth geisio gwerthu'r busnes oedd cost yr ymrwymiad i'r cynllun pensiwn.

Mae'r cwmni am weld newid i'r cynllun pensiwn cyn gwneud buddsoddiad pellach