Paul Trollope yn cael ei benodi fel rheolwr Caerdydd
- Cyhoeddwyd

Mae prif hyfforddwr Caerdydd, Paul Trollope wedi cael ei gadarnhau fel rheolwr newydd y clwb.
Mae'r cyn-chwaraewr canol cae Cymru, 43 oed, wedi bod yn rhan o staff hyfforddi'r clwb ers mis Chwefror 2015.
Cafodd Russell Slade ei dynnu o'i rôl fel rheolwr ar ddiwedd y tymor, ac ef nawr yw pennaeth pêl-droed yr Adar Gleision.
"Mae'n rhaid i ni fod yn uchelgeisiol a chael pawb o fewn y clwb i gredu yn yr hyn dy'n ni'n ei wneud yma," meddai Trollope.
"Y targed yw'r gemau ail gyfle a dyrchafiad, gobeithio."
Effaith ar Gymru
Mae Trollope, wnaeth dreulio pum mlynedd fel rheolwr Bristol Rovers, hefyd yn rhan o dîm hyfforddi Cymru.
Dywedodd y bydd yn aros yn ei rôl gyda'r tîm cenedlaethol ar gyfer pencampwriaeth Euro 2016 yn Ffrainc fis nesaf.
"Dydw i ddim yn ei weld fel unrhyw fath o rwystr o ran paratoi ar gyfer y tymor newydd [gyda Chaerdydd]," meddai.
"Fe fydda i'n trafod ymarferoldeb parhau gyda Chymru ar ôl Euro 2016."