Leanne Wood yn amddiffyn sefyll mewn dwy sedd
- Cyhoeddwyd

Bydd Leanne Wood yn ceisio cael ei hethol mewn sedd ranbarthol ac etholaethol
Mae arweinydd Plaid Cymru, Leanne Wood, wedi amddiffyn ei phenderfyniad i ymgeisio am ddwy sedd yn etholiadau'r cynulliad y flwyddyn nesaf.
Dywedodd y byddai'n "gwneud popeth" i gael ei hethol yn Y Rhondda ond y byddai'n ceisio amddiffyn sedd Canol De Cymru.
Mae'r gwaharddiad ar ymgeiswyr yn ymgeisio mewn seddi rhanbarthol ac etholaethol wedi cael ei ddileu.
Wrth ymweld â ffatri Toyota yn Sir y Fflint, dywedodd Ms Wood wrth BBC Cymru: "Mae hyn yn rhywbeth 'nes i ddweud sbel yn ôl ... dydi hyn ddim yn newyddion.
"Dw i'n bwriadu sefyll yn Y Rhondda, ble dw i'n byw, ac mi fydda i'n gwneud popeth i geisio ennill y bleidlais gyntaf heibio'r postyn yno.
'Siomedig'
"Ond gan fod y rheolau wedi newid, mi fydda i hefyd yn rhoi fy enw ymlaen ar gyfer y rhestr ranbarthol a dw i'n annog gwleidyddion eraill i wneud hynny hefyd."
Mae Alun Davies o'r Blaid Lafur wedi dweud bod penderfyniad Ms Wood yn "siomedig".
Dywedodd yr AC Llafur Leighton Andrews, sy'n dal sedd Y Rhondda, y byddai'n ymgeisio am sedd etholaethol yn unig.
Y llynedd roedd Ms Wood wedi dweud y byddai hi "fwy na thebyg" yn sefyll fel ymgeisydd rhanbarthol ac etholaethol pe bai'n bosib.
O'r 60 o Aelodau Cynulliad, mae 40 yn cynrychioli seddi etholaethol ac 20 yn cael eu hethol o bum rhestr ranbarthol.