မွန်မှာ စောင့်ကြည့်ရေးစင်တာတွေက စောင့်ကြည့်ရက် ၁၄ ရက် မပြည့်သေးသူတွေ အပါအဝင် အားလုံးကို ပြန်လွှတ်

တပ်မတော်ရဲ့စောင့်ကြည့်ရေးစင်တာတစ်ခု
ဓာတ်ပုံ ပုံစာ, တပ်မတော်ရဲ့စောင့်ကြည့်ရေးစင်တာတစ်ခု
ရေးသားခဲ့သည်။

မွန်ပြည်နယ်မှာ သထုံမြို့အပါအဝင် မြို့နယ်၁၀ခုမှာ ရှိတဲ့ စောင့်ကြည့်ရေးစင်တာတွေက စောင့်ကြည့်ရက် ၁၄ ရက်ပြည့်ပြီးသူ တွေအပြင် မပြည့်သေးသူ ပြည်တော်ပြန်အားလုံးကို ဧပြီ ၁၀ ရက်နေ့က နေအိမ်တွေကို ပြန်လည်စေလွှတ် ခဲ့တယ်လို့ သိရကြောင်း မွန်ပြည်နယ်လွှတ်တော် သထုံလွှတ်တော်အမတ် ဒေါ်ခိုင်ခိုင်လဲ့က ဘီဘီစီကို ပြောပါတယ်။

မွန်ပြည်နယ်အတွင်းက ပြည်တော်ပြန်တွေအနက် ဧပြီ ၁၀ ရက်နေ့အထိ စောင့်ကြည့်လူနာထဲက သေဆုံး သူ ၁၀ ဦးအထိရှိလာပြီလည်း ဖြစ်ပါတယ်။

' ' မနေ့က သောကြာနေ့က အကုန်လုံးကို ပြန်လွှတ်လိုက်တာ။ ဘာကြောင့်လွှတ်တယ်ဆိုတာ လည်း မသိရဘူး။ ဒီလူတွေကို နေအိမ်မှာပဲ ကွာရန်တင်းလုပ်မယ်လို့ သိရတယ်။ ဒါပေမယ့် စောင့်ကြည့် စင်တာမှာတောင် စည်ကမ်းလိုက်နာမှုရှိတာ မဟုတ်ဘူး။ ၆ ပေခွာဆို ကုတင်တွေ ကပ်ထားတယ်။ နေအိမ်ပြန်ရောက် တော့လည်း အိမ်မှာမနေဘူး။ ဆိုင်ကယ်နဲ့ လမ်းထွက်နေကြတယ်''လို့ ဒေါ်ခိုင်ခိုင်လဲ့က အခြေအနေကို ပြောပြပါတယ်။

စောင့်ကြည့်စင်တာတွေကနေ ပြည်တော်ပြန်တွေကို ပြန်လွှတ်တာဟာ ပြည်နယ်အစိုးရက တိုက်ရိုက်ဆောင်ရွက်တာဖြစ်တယ်လို့ ပြည်နယ်လွှတ်တော်ကိုယ်စားလှယ်ရဲ့ ပြောပြချက်အရသိရပြီး အတည်ပြုနိုင်ဖို့ ပြည်နယ်အစိုးရအဖွဲ့အတွင်းရေးမှူးကို ဘီဘီစီက ဆက်သွယ်မေးမြန်းဖို့ ဖုန်းခေါ်ဆိုခဲ့ပေမယ့် မရရှိခဲ့ပါဘူး။

မွန်ပြည်နယ်အတွင်း သေဆုံးခဲ့တဲ့ စောင့်ကြည့်လူနာ ၁၀ ဦးကို ကိုဗစ်- ၁၉ ပိုး ရှိမရှိ ဓာတ်ခွဲနမူနာ ရယူခဲ့ပြီးနောက် ဧပြီ ၁၀ ရက်နေ့က သေဆုံးလူနာတွေကလွဲလို့ ကျန်သေဆုံးလူနာတွေမှာ ပိုးမတွေ့ရဘူးလို့လည်း ကျန်းမာရေးဝန်ကြီးဌာနက ထုတ်ပြန်ထားချက်တွေအရ သိရပါတယ်။

' 'မနေ့က သေတဲ့သူတွေထဲမှာ သံဖြူဇရပ်က ပါတယ်။ သထုံက ပါတယ်။ ပင က တစ်ဦးပါတယ်။ ဒီလူတွေရဲ့ အဖြေကတော့ မသိရသေးဘူး။ ဒီထဲက သေတဲ့တစ်ယောက်ဆိုရင် စောင့်ကြည့်မှု မခံယူဘဲ လျှောက်သွားနေတာ။ ဆေးခန်းတွေလည်း သွားပြတယ်။ ကျွန်မလိုက်ပြီး နောက်ကြောင်းလိုက်ပြီး ထိုင်းကပြန်လာတဲ့သူဆိုတာ သိရလို့ ဆေးရုံတက်ဖို့ အတင်းလုပ်ခဲ့ရတာ။ ဒီမှာက ပြန်လာသူတချို့က စည်းကမ်းတွေလည်း မလိုက်နာကြဘူး''လို့လည်း ဒေါ်ခိုင်ခိုင်လဲ့က ပြောပါတယ်။

မွန်ပြည်နယ်အတွင်း ထိုင်းနိုင်ငံက ပြန်ဝင်လာသူအများအပြားရှိပြီး သထုံမြို့နယ်တစ်ခုတည်းမှာ ပြန်ဝင်လာသူ စာရင်းမှာ ၁၆၀၀ ကျော်ရှိသော်လည်း စောင့်ကြည့်ရေးစင်တာကို ရောက်လာသူ ဦးရေမှာ ၈၀၀ ကျော်သာရှိ တယ်လို့လည်း ပြည်နယ်လွှတ်တော်အမတ်တွေထံက သိရပါတယ်။

သထုံမြို့နယ်အတွင်း စောင့်ကြည့်ရေးစင်တာတစ်ခုကို ပြီးခဲ့တဲ့ တပတ်အတွင်းက တွေ့ရစဉ်
ဓာတ်ပုံ ပုံစာ, သထုံမြို့နယ်အတွင်း စောင့်ကြည့်ရေးစင်တာတစ်ခုကို ပြီးခဲ့တဲ့ တပတ်အတွင်းက တွေ့ရစဉ်

ကျန်းမာရေးနဲ့အားကစားဝန်ကြီးဌာနကနေ ပြည်တော်ပြန်ဝင်လာသူတွေကို စောင့်ကြည့်ရေးစင်တာမှာ ၁၄ ရက်စောင့်ကြည့်မှုခံယူဖို့နဲ့ ငြင်းဆန်ပါက ဥပဒေအရအရေးယူဖို့ ထုတ်ပြန်ထားတာ တွေလည်းရှိပါတယ်။

ဒါပေမယ့်လည်း သထုံမြို့နယ်အတွင်းမှာတော့ စည်းကမ်းမလိုက်နာသူတွေကို အရေးယူတာမျိုးတော့ မတွေ့ရဘူးလို့ လည်း ပြည်နယ်လွှတ်တော်ကိုယ်စားလှယ် ဒေါ်ခိုင်ခိုင်လဲ့ကပြောပြပါ တယ်။

ဒါ့အပြင် စောင့်ကြည့်ရေးစင်တာတွေက စောင့်ကြည့်လူနာ ဒါမှမဟုတ် သံသယလူနာတွေထွက်ပြေးလို့ အရေးယူတာ ထောင်ချတာတွေရှိလာခဲ့ရင်လည်း အကျဉ်းထောင်တွေမှာ လက်မခံဖို့ အကျဉ်းဦးစီးဌာန ကနေ ညွှန်ကြားထားတာတွေရှိတယ်လို့လည်း မွန်ပြည်နယ် အကျဉ်းဦးစီးဌာနက တာဝန်ရှိသူတစ်ဦးက ပြောပြပါတယ်။

' ' ဒီမှာကတော့ အခုထိ အပြစ်ပေးအရေးယူတဲ့သူတွေလည်း မရှိသေးဘူး။ ရှိလာရင်လည်း ဆေးရုံတွေမှာပဲ ထားဖို့ ဌာနချင်း ချိတ်ဆက်စီစဉ်ထားတာတော့ရှိပါတယ်။ ရောဂါကာကွယ် ရေးအရ အကျဉ်းထောင်တွေမှာတော့ လက်မခံဖို့ ညွှန်ကြားချက် ရှိပြီးသားပါ''လို့ အဆိုပါ တာဝန်ရှိသူကပြောပြ ပါတယ်။

မြန်မာနိုင်ငံမှာ ကိုဗစ်-၁၉ ပိုးတွေ့ လူနာ ၁၈ ဦးအနက် စောင့်ကြည့် ၁၄ ရက်ပြည့်ပြီးနောက်ပိုင်းမှာမှ လူနာအမှတ် ၁ ရဲ့ မိခင်ဖြစ်သူ မှာ လက္ခဏာမပြ ပိုးရှိကြောင်း တွေ့ရှိခဲ့တဲ့ အတွက် စောင့်ကြည့်ကာလ ကို တိုးမြှင့်ပေးဖို့ အများပြည်သူအကြား ပြောဆိုထောက်ပြတာတွေလည်းရှိနေပါတယ်။