ቀጥታ , የየመን ሁቲ ታጣቂዎች የሳዑዲ ዋና ከተማ ሪያድን እና የኃይል ማመንጫን ዒላማ እንደሚያደርጉ ዛቱ

የየመን ሁቲ ታጣቂዎች ከሳዑዲ አረቢያ ለተፈጸምባቸው ጥቃት አጸፋ የዋና ከተማዋ ሪያድ የፋይናንስ ማዕከልን እና የኃይል ማመንጨዋን ዒላማ እንደሚያደርጉ ዛቱ።

ጭምቅ ሃሳብ

የቀጥታ ሽፋን

  1. በየመን ደቡባዊ የባሕር ዳርቻ በአንድ የጭነት መርከብ ላይ ጥቃት ተፈጸመ

    በየመን ባሕር ዳርቻ ላይ የምትታይ ጀልባ
    የምስሉ መግለጫ, በየመን ባሕር ዳርቻ ላይ የምትታይ ጀልባ (ፎቶ ፋይል)

    በየመን ደቡባዊ ጠረፍ አካባቢ በአንድ ጀልባ ላይ የተሳፈሩ ታጣቂዎች በጭነት መርከብ ላይ ተኩስ ከፍተው ጥቃት መፈጸማቸውን የዩናይትድ ኪንግደም የባሕር ደኅንነት ተቋም አስታወቀ።

    የዩኬ የባሕር ትራንስፖርት ኦፕሬሽን የተባለው ተቋም እንዳለው፣ በንግድ መርከቡ ላይ ጥቃቱ የተፈጸመው ከየመን የሙካላ የባሕር ጠረፍ ደቡብ ምዕራብ ላይ ነው።

    በዓለም አቀፍ የመርከብ መተላለፊያ በኩል ወደ ምሥራቅ በማቅናት ላይ የነበረው የጭነት መርከብ፣ ማንነታቸው ያልታወቁ ታጣቂዎችን ከተሳፈሩበት ትንሽ ጀልባ ተኩስ ተከፍቶበት የመርከቡ ጠባቂዎች የማስጠንቀቂያ መልስ መተኮሳቸውን ተቋሙ ገልጿል።

    ከመርከቡ የታጠቁ ጠባቂዎች በተከፈተባቸው የአጸፋ ተኩስ ምክንያት አጥቂዎቹን ያያዘው ትንሽ ጀልባ ከቦታው ለመራቅ በመገደዱ የጭነት መርከቡ ጉዞውን መቀጠሉን ኤጀንሲው አመልክቷል።

    የመርከቡ ካፒቴን በመርከቡ ላይ ምንም ጉዳት እንዳልደረሰ እና ከሠራተኞቹም መካከል የተጎዳ እንደሌለ ሪፖርት አድርጓል።

    የመርከብ እንቅስቃሴዎችን የሚከታተለው ኤጀንሲ ጥቃቱ የተፈጸመበት የጭነት መርከብ፣ በየትኛው አገር እንደተመዘገበ እና እያንቀሳቀሰው ያለው ተቋም ማን እንደሆነ እንዲሁም ጥቃቱ በማን እንደተፈጸመ አልገለጸም።

    ይህ ጥቃት ባለፈው ማክሰኞ ዕለት በየመን ጠረፍ አካባቢ በአንድ ሌላ የጭነት መርከብ ላይ ከተፈጸመ ተመሳሳይ ጥቃት በኋላ ያጋጠመ ነው።

    በየመን እና በሶማሊያ ባለው አለመረጋጋት ምክንያት በሕንድ ውቅያኖስ እና በቀይ ባሕር ደቡባዊ ክፍል ላይ በሚንቀሳቀሱ የንግድ መርከቦች ላይ የሚፈጸሙ ጥቃቶች እየተደጋገሙ መጥተዋል።

  2. በአሜሪካ ተቋማት ላይ የሳይበር ችግር ካጋጠመ በኋላ አንድ ከፍተኛ ባለሥልጣን ከኃላፊነት ተነሱ

    ሾን ኬርንክሮስ ከፕሬዝዳንት ትራምፕ ጋር
    የምስሉ መግለጫ, ሾን ኬርንክሮስ ከፕሬዝዳንት ትራምፕ ጋር እየተጨባበጡ

    በአሜሪካ ቁልፍ ተቋማት ላይ የበይነ መረብ መስተጓጎል ካጋጠመ በኋላ የመንግሥት ከፍተኛ የሳይበር ደኅንነት ኃላፊ አንድ ዓመት ከቆዩበት ኃላፊነታቸው መሰናበታቸውን ተዘገበ።

    የቢቢሲ የአሜሪካ አጋር የሆነው ሲቢኤስ እና ሌሎች መገናኛ ብዙኃን እንደዘገቡት፣ የዋይት ሐውስ ብሔራዊ የሳይበር (በይነ መረብ) ዳይሬክተር ሾን ኬርንክሮስ የፕሬዝዳንቱ ጽህፈት ቤት ኃላፊ የሆኑት የስቴፈን ሚለርን እምነትን ካጡ በኋላ ከሥራቸው ተሰናብተዋል።

    ይህ ዜና የባንክ አገልግሎቶችን፣ የአየር ትራንስፖርት በረራ ቁጥጥርን እና ሌሎች ዘርፎችን የነኩ ተከታታይ የቴክኖሎጂ መስተጓጎሎች ከተከሰቱ በኋላ ነው ይፋ የሆነው።

    የአሜሪካ ባለሥልጣናት እነዚህ መቋረጦች በሳይበር ጥቃት አልተከሰቱም ቢሉም፣ መስተጓጎሎቹ በኮንግረስ አባላት ዘንድ ጥያቄ በማስከተላቸው ትክክለኛ ማብራሪያ እንዲሰጥ ጥሪ ቀርቧል።

    ኬርንክሮስ ከሥራ መነሳታቸውን በይፋ የሚያረጋግጥ መግለጫ አልወጣም። ሆኖም የአሜሪካ የውጭ ጉዳይ ሚኒስትር ማርኮ ሩቢዮ በኤክስ ላይ ባሰፈሩት መልዕክት፣ የመከላከያ ሚኒስቴር ዋና የመረጃ ቴክኖሎጂ ኃላፊ የሆኑት ኪርስተን ዴቪስ አዲሷ የብሔራዊ የሳይበር ደኅንነት ዳይሬክተር መሆናቸውን ገልጸዋል።

    በሳምንቱ መጀመሪያ ላይ ሩቢዮ “እነዚህ የበይነ መረብ መስተጓጎሎች ተያያዥነት ያላቸው ናቸው የሚል ምንም ማስረጃ የለም” ሲሉ ተናግረው፣ “ጥቃት አልደረሰብንም” ብለዋል።

    ነገር ግን እነዚህ የቴክኖሎጂ መቋረጦች በአጭር ጊዜ ውስጥ በተከታታይ መከሰታቸው ብዙ ሰዎች በዕለት ተዕለት ኑሯቸው በእጅጉ በሚተማመኑባቸው የቴክኖሎጂ ሥርዓቶች ደኅንነት እና አስተማማኝነት ላይ ስጋትን ፈጥሯል።

    ተያያዥ ዜና

  3. የየመን ሁቲ ታጣቂዎች የሳዑዲ ዋና ከተማ ሪያድን እና የኃይል ማመንጫን ዒላማ እንደሚያደርጉ ዛቱ

    የሁቲ ተዋጊዎች
    የምስሉ መግለጫ, የሁቲ ተዋጊዎች

    የየመን ሁቲ ታጣቂዎች ከሳዑዲ አረቢያ ለተፈጸምባቸው ጥቃት አጸፋ የዋና ከተማዋ ሪያድ የፋይናንስ ማዕከልን እና የኃይል ማመንጨዋን ዒላማ እንደሚያደርጉ ዛቱ።

    ይህ የሁቲዎች ዛቻ የተሰማው በሳዑዲ የሚመራው ጥምር ጦር ነዋሪዎች በታጣቂ ቡድኑ ቁጥጥር ስር ያለችውን የሆዴይዳ ወደብን ለቅቀው እንዲወጡ አና በየመን ሁለት የኃይል ማመንጫ ጣቢያዎች ላይ ጥቃት ከፈጸመ በኋላ ነው።

    የሁቲ ወታደራዊ ቃል አቀባይ ያህያ ሳሬ በኤክስ የማኅበራዊ ሚዲያ ላይ ባሰፈሩት መልዕክት “በሳዑዲ...ዋና ከተማ ሪያድ የሚገኘው የፋይናንስ ማዕከል ለኃይሎቻችን ወታደራዊ ዒላማ መሆኑን እናስታውቃለን” በማለት ሠራተኞች እና ነዋሪዎች ከአካባቢው እንዲርቁ አስጠንቅቀዋል።

    በተመሳሳይም ሳዑዲ መሩ ጥምር ኃይል በየመን ሁለት የኃይል ማመንጫ ጣቢያዎች ላይ ለተፈጸመው ጥቃት ምላሽ በደቡብ ምዕራብ ሳዑዲ አረቢያ የሚገኘውን ሹቃይቅ የሚባለው የኃይል ማመንጫ ጣቢያ ዒላማው እንደሚሆን ቃል አቀባዩ ዝተዋል።

    “ጠላት ሳዑዲ በሰዓዳ እና በሞካ የኃይል ማመንጫ ጣቢያዎች ላይ ለፈጸመው ጥቃት ምላሽ፣ የሹቃይቅ የኃይል ማመንጫ ጣቢያ በሚቀጥሉት ሰዓታት ለኃይሎቻችን ሕጋዊ ዒላማ እንደሚሆን እናስታውቃለን” ብለዋል ያህያ ሳሬ።

    የሁቲዎች ቴሌቪዥን ጣቢያ የሆነው አል ማሲራ በሰሜን የሰዓዳ ከተማ እና በቀይ ባሕር ዳርቻዋ የሞካ ከተማ ውስጥ ባሉ የኃይል ማመንጫ ጣቢያዎች ላይ የሳዑዲ የአየር ጥቃቶች መፈጸሙን ቀደም ብሎ ዘግቧል።

    ተያያዥ ዘገባዎች

  4. ደቡብ ኮሪያ የተማሪዎች ፈተና ማጭበርበርን ለመቆጣጠር ብሔራዊ የአደጋ ጊዜ ሥርዓቷን ተጠቀመች

    ፍተሻ ሲደረግ
    የምስሉ መግለጫ, በተፈታኞች ላይ ጠንካራ ፍተሻ እና ቁጥጥር ቢደረግም ከ100 በላይ ተማሪዎች ተይዘዋል

    የደቡብ ኮሪያ ትምህርት ሚኒስቴር ወሳኝ በሚባለው ብሔራዊ ፈተና ወቅት ያልተፈቀዱ መገልገያዎችን ይዘው የተገኙ 111 ተፈታኞች መያዛቸውን አስታወቀ።

    ይህም በሰው ሰራሽ አስተውሎት (ኤአይ) እገዛ የሚፈጸሙ የኩረጃ ክስተቶች እየጨመሩ በመምጣታቸው ባለሥልጣናት አስቸኳይ የመከላከያ እርምጃዎችን ካስጀመሩ በኋላ እንደተደረሰበት ተገልጿል።

    ባለሥልጣናት እንዳሉት ከተያዙት ተማሪዎች መካከል አምስት ተፈታኞች በፈተናው ወቅት ዘመናዊ መሣሪያዎችን ሲጠቀሙ እጅ ከፍንጅ ተደርሶባቸዋል።

    በዚህ ሳምንት በተካሄደው የዩኒቨርሲቲ መግቢያ ፈተና፣ ወይም “ሱኑንግ” ተብሎ በሚታወቀው ፈተና፣ 500 ሺህ የሚጠጉ ተማሪዎች ተፈትነዋል። ፈተናው የተካሄደው በቅርብ ጊዜ የተከሰቱ በርካታ የኩረጃ ቅሌቶች መነጋገሪያ ከሆኑ በኋላ ነው።

    ከፈተናው በፊት ባለሥልጣናት በፈተና አዳራሾች ውስጥ የሚገኙ ያልተፈቀዱ መሣሪያዎችን ለመለየት ወደ አገሪቱ ሁሉም የሞባይል ስልኮች የአስቸኳይ ማስጠንቀቂያ መልዕክቶችን መላክን ጨምሮ የኩረጃ መከላከያ እርምጃዎችን ወስደዋል።

    አርብ ዕለት ጠቅላይ ሚኒስትር ሊ ጄ ሚዩንግ በኤአይ እገዛ የሚፈጸሙ ኩረጃዎችን ለመከላከል የፈተና ሥርዓቱ በሙሉ እንዲከለስ ጠይቀዋል።

    “በደቡብ ኮሪያ የሚሰጡ ብሔራዊ ፈተናዎች የዜጎችን የወደፊት ዕጣ በከፍተኛ ሁኔታ ያወስናሉ” ሲሉ ሊ ገልጸው፣ ኤአይ በመጠቀም በእንዲህ ያሉ ፈተናዎች ወቅት መኮረጅ “ፍትህን እና እምነትን በማዳከም የማኅበረሰባችንን መሠረታዊ ሥርዓት ያናውጣል” ብለዋል።

    በደቡብ ኮሪያ የትምህርት ሥርዓት ላይ አሉ የተባሉ ብልሹነቶች ባለፉት ሳምንታት መነጋገሪያ ሆነው ቆይተዋል፤ ተፈታኞች በኤአይ የሚሠሩ መሣሪያዎችን በመጠቀም ሲኮርጁ መገኘታቸውን የሚገልጹ ሪፖርቶች ወጥተዋል።

    ባለፈው ወር ሁለት ተፈታኞች በዩኒቨርሲቲ መግቢያ ፈተናዎች ወቅት ኤአይ የተገጠመባቸውን መነጽሮች በመጠቀም ሲኮርጁ ተይዘዋል።

    የፈተና ማጭበርበርን ለመከላከል ሐሙስ በመላው አገሪቱ ያሉ ስልኮች በሚላክላቸው መልዕክት በአንድ ጊዜ እንዲጮኹ በማድረግ ብሔራዊ ማስጠንቀቂያ እንዲተላለፍ ተደርጓል።

    ይህም ደቡብ ኮሪያ የአገራዊ የአደጋ ጊዜ ማስጠንቀቂያ ሥርዓቷን የፈተና ማጭበርበርን ለመከላከል ለመጀመሪያ ጊዜ ጥቅም ላይ እንድታውል አድርጓታል።

    በተደረገው ጥብቅ ቁጥጥር ተፈታኞች በሸሚዞቻቸው እና በጃኬቶቻቸው ላይ ያሉ ቁልፎችን እንዲሸፍኑ በማድረግ የተደበቁ ካሜራዎችን እንዳይጠቀሙ የደተደረገ ሲሆን፤ የተማሪዎች መነጽሮችም በጥንቃቄ ተመርምረዋል።

    ተያያዥ ዜና

  5. በደቡብ አፍሪካ በሦስት ወር ውስጥ ወደ 600 የሚጠጉ ሴቶች ተገድለው መገኘታቸው ተዘገበ

    የሴቶችን ግድያ በመቃወም አደባባይ የወጡ ደቡብ አፍሪካውያን
    የምስሉ መግለጫ, የሴቶችን ግድያ በመቃወም አደባባይ የወጡ ደቡብ አፍሪካውያን

    ከሐምሌ እስከ መስከረም ባለው ጊዜ ወደ 600 የሚጠጉ ሴቶች ደቡብ አፍሪካ ውስጥ መገደላቸውን የአገሪቱ የወንጀል መረጃ ይፋ አደረገ።

    ቁጥሩ በጆሃንስበርግ እና አካባቢው የተጣሉ በከፊል እርቃናቸውን የነበሩ እና በሰውነታቸው ላይ ጉዳት (ቁስለት) የነበረባቸውን 13 ሴቶች ያካትታል።

    ግድያዎቹ የሕዝቡን ቁጣን የቀሰቀሱ ሲሆን፣ ፖሊስ ወንጀለኞቹን ለፍትሕ እንዲያቀርብ ከፍተኛ ግፊት በርትቶበታል። በዓለም ላይ ፆታን መሠረት ያደረገ ጥቃት እና ግድያ ከፍተኛ ከሆኑባቸው አገራት አንዷ ደቡብ አፍሪካ ናት።

    በዚህ ሳምንት መጀመሪያ ላይ ብቻ በፍሪ ስቴት ግዛት ውስጥ አምስት ሴቶች እና አንድ ታዳጊ ሕፃን በጥይት ተገድለዋል።

    አርብ ዕለት ይፋ የሆነው የወንጀል መረጃ እንደሚያሳየው ከሐምሌ እስከ መስከረም ባለው ጊዜ ውስጥ 581 ሴቶች ተገድለዋል። ከእነዚህም መካከል 131ዎቹ ጆሃንስበርግን ባካተተው በጋውቴንግ ግዛት ውስጥ የተፈጸሙ ናቸው።

    መረጃው የግድያ ወንጀሎች በትንሹ መቀነሳቸው ያሳያል።

    ፖሊስ 5,590 የግድያ ወንጀሎች መመዝገባቸውን የገለጸ ሲሆን፣ ይህም ካለፈው ዓመት ተመሳሳይ ወቅት ጋር ሲነጻጸር በ204 የቀነሰ ነው። ሆኖም ቁጥሩ አሁንም በቀን በአማካይ ወደ 60 የሚጠጉ ግድያዎች ይፈጸማሉ እንደማለት ነው።

    ፖሊስ ከቅርብ ጊዜ ወዲህ በመረጃዎቹ ውስጥ "ያልተለመዱ ነገሮች" አሉ በሚል ምክንያት የተገደሉት ሴቶች ቁጥር ጨምሯል ወይስ ቀንሷል የሚለውን ግልጽ አላደረገም።

    የፖሊስ ሚኒስትር ተጠባባቂ ኃላፊ ፊሮዝ ካቻሊያ በሴቶች እና በልጆች ላይ የሚፈጸመውን ጥቃት ለመከላከል "የበለጠ ጥረት" እንደሚያስፈልግ ተናግረዋል።

    የጋውቴንግ ግዛት የፖሊስ አዛዥ ሐሙስ ዕለት እንደገለጹት በዚህ ዓመት መጀመሪያ ላይ አገራዊ ቁጣ ከቀስቅሱት 13 ግድያዎች ጋር የተያያዙ ስምንት ሰዎች በቁጥጥር ስር ውለዋል።

    በቁጥጥር ስር ከዋሉት መካከል ሦስቱ ከኤልዛቤት ሞሴላክጎሞ ግድያ ጋር የተያያዙ ናቸው ብለዋል ጄኔራል ቶሚ ምቶምቤኒ። ኤልዛቤት በሩጫ ስፖርት የምትታወቅ ስትሆን መጥፋቷን ተከትሎ በመላ አገሪቱ ከፍተኛ ትኩረት የሳበ የፍለጋ ዘመቻ ሲካሄድ ቆይቷል።

    የ38 ዓመቷ ሯጭ ኬምፕተን ፓርክ ከሚገኘው መኖሪያ ቤቷ አቅራቢያ ለዕለት ተዕለት ሩጫዋ በወጣችበት ወቅት ነበር የጠፋችው።

    ከቀናት በኋላም በሰውነቷ ላይ ከፍተኛ ጉዳት ደርሶ ከፊል ልብሷ ተራቁቶ አስከሬኗ ተገኝቷል።

    ተያያዥ ዜናዎች

  6. አዲስ የጣፊያ ካንሰር መድኃኒት ዕጢው እንዲከስም በማድረግ ተስፋ ሰጪ ውጤት አሳየ

    መድኃኒት

    በጣፊያ ካንሰር ምርምር ትልቅ ስኬት የተባለ መድኃኒት ተገኝቷል።

    በየቀኑ የሚወሰደው መድኃኒት የተወሰኑ ታማሚዎች ላይ የዕጢው መጠን እንዲቀንስ ወይም ሙሉ በሙሉ እንዲጠፋ ማድረግ እንደሚችል ተገልጿል።

    የጣፊያ ካንሰር እጅግ አደገኛ ከሆኑ እና ለማከም ከሚያስቸግሩ የካንሰር ዓይነቶች አንዱ ነው።

    በሙከራው ወቅት ዳራክሶንራሲብ (daraxonrasib) የተባለው መድኃኒት ከኪሞቴራፒ ጋር ከተሰጣቸው 12 ታካሚዎች አንደኛቸው ካንሰሩ እንዳልታየባቸው ተገልጿል።

    በሙከራው ተሳታፊ የሆኑ ሁሉም 61 ታካሚዎች ላይ ደግሞ ዕጢው ማደግ አቁሟል። እነዚህ ታካሚዎች የተባባሰው የካንሰር ደረጃ ላይ እንደሚገኙ በቅርቡ የተነገራቸው ናቸው። የጣፊያ ካንሰር በመላው ሰውነታቸውም ተስፋፍቷል።

    ሐኪሞች መድኃኒቱ ለምን ያህል ጊዜ በሽታውን ማስወገድ እንደሚችል ለማወቅ ጊዜው ገና መሆኑን አስምረውበታል። መድኃኒቱ እንደ ፈዋሽ እንዳይታይም አስጠንቅቀዋል።

    የዩናይትድ ኪንግደም የካንሰር ምርምር ማዕከል “በአሥርት ዓመታት ትልቅ የሆነ ሽግግር ነው” ሲል ገልጿል።

    የማዕከሉ ተመራማሪ ዶ/ር ሳም ጉድፍሪ “አዲሱ መድኃኒት የማይታከመውን ሕመም ለማከም ያስቻለ ነው” ሲሉ ለቢቢሲ ተናግረዋል።

    በጣፊያ ካንሰር ምርምር እስካሁን ያልታየ ውጤት መስተዋሉን አስረድተዋል።

    የጣፊያ ካንሰር ለማከም ከባድ ከመሆኑ ባሻገር ከበሽታው የማገገም ዕድል ውስን ነው።

    ኬሞቴራፒ (የጨረር ሕክምና) የዕጢውን መጠን ቢቀንስም ካንሰሩ ተመልሶ ያድጋል።

    መድኃኒቱ ላይ በተደረገው ሙከራ ለአንድ ዓመት ተኩል ሕሙማን ክትትል ተደርጎላቸዋል። መድኃኒቱ የሕሙማንን ዕድሜ እንደሚያራዝም ተስፋ ተጥሎበታል።

    በሙከራው ወቅት የተገኙት ውጤቶች የሚከተሉት ናቸው፡

    • 90% ሕሙማን ላይ ዕጢው ማደግ አቁሟል
    • ከ60% በላይ ታካሚዎች ዕጢያቸው መጠኑ ቀንሷል ወይም ጠፍቷል
    • ወደ 8% በሚሆኑት ታካሚዎች ውስጥ ከ12ቱ መካከል አንደኛቸው ሲቲ ስካን ሲደረግላቸው ዕጢው አልታየም
  7. ሪፐብሊካኑ እንደራሴ በኢትዮጵያ እና ኤርትራ መካከል ሰላም ለማውረድ የሚያስችል ረቂቅ አቀረቡ

    ጂም ባይርድ

    ኢትዮጵያ እና ኤርትራ ሰላም እንዲያወርዱ ለማድረግ አሜሪካ የምግብ ኤክስፖርት፣ የግብርና ቁሳቁስ እና የክህሎት አቅርቦትን እንደ መሣሪያ እንድትጠቀም ሪፐብሊካኑ የሕዝብ እንደራሴ ሐሳብ አቀረቡ።

    ሪፐብሊካኑ ጂም ባይርድ ያቀረቡት ረቂቅ ሕግ፤ ኢትዮጵያ እና ኤርትራ ከቻይና ጋር ያላቸውን ትስስር እንዲያላሉ ለማድረግ ያለመ ነው።

    ‘ኢትዮጵያ ስፓርክ አክት’ እና ‘ኤርትራ ፒላር አክት’ የተባሉት ረቂቆች በኢትዮጵያ እና ኤርትራ መካከል ዘላቂ ሰላም ለማምጣት ያለሙ መሆናቸውን በኤክስ ገጻቸው ባሰፈሩት ጽሑፍ አትተዋል።

    ዘላቂ ሰላም በማስፈን የንግድ ተጠቃሚነትን ማረጋገጥ እና የአሜሪካን የግብርና ምርቶች፣ የመሣሪያዎች እና የክህሎት ኤክስፖርትን ማሳደግ እንደሚሹም ጠቅሰዋል።

    የአሜሪካ የአፍሪካ የውጭ ግንኙነቶች ንዑስ ኮሚቴ አባል የሆኑት እንደራሴው ያቀረቡት ረቂቅ በአገራቱ መካከል ሰላም የማስፈን እንቅስቃሴን ከግብርና ኤክስፖርት ጋር ያስተሳሰረ ነው።

    አሜሪካ የምትሰጠውን የበቆሎ፣ አኩሪ አተር፣ የከብት መኖ፣ የግብር ቁሳቁስ እና የቴክኒክ ድጋፍ እንደ ጫና ማሳደሪያ ተጠቅማ በሁለቱ አገራት መካከል ሰላም ማስፈን እንዳለባት አመልክተዋል።

    አያይዘውም አሜሪካን ከቻይና በበለጠ የአፍሪካውያን አገራት አጋር ማድረግን ጠቅሰዋል።

    በምሥራቅ አፍሪካ የሚገኙ እንደ ወርቅ፣ መዳብ፣ ብር፣ ዚንክ፣ የተፈጥሮ ነዳጅ እና ፖታሽ ያሉ ማዕድናትን በማውጣት እና የባሕር ወደብ መሠረተ ልማትን ጥቅም ላይ በማዋል አሜሪካ ድጋፍ መስጠት እንዳለባት አመልክተዋል።

    “ምሥራቅ አፍሪካ በምጣኔ ሃብት ተጠቃሚ መሆን ትችላለች። ይህም ለዘላቂ ሰላም እና ብልጽግና መሠረት ይጥላል” ብለዋል።

    አፍሪካውያን አገራት የሰላም ትብብርን የሚከተሉ ከሆነ የምጣኔ ሃብት እድገትን ለማረጋገጥ አሜሪካ ድጋፍ እንደምትሰጥ መልዕክት ማስተላለፍ እንደሚቻል አክለዋል።

    • ተያያዥ ዜናዎች፡
  8. በአስር ሺህዎች የሚቆጠሩ የዩኬ ማቀዝቀዣዎች በጠላፊዎች እጅ እንዳይገቡ ተደረገ

    ማቀዝቀዣ

    በዩናይትድ ኪንግደም በሱፐርማርኬቶች፣ በመጋዘኖች፣ በምግብ ቤቶች፣ በነዳጅ ማደያ ጣቢያዎች እና በስታዲየሞች የሚገኙ በአስር ሺህዎች የሚቆጠሩ ማቀዝቀዣዎች ከጠላፊዎች ጥቃት መጠበቃቸውን ቢቢሲ መረዳት ቻለ።

    ማቀዝቀዣዎቹ የጠላፊዎች ሰላባ እንዳይሆኑ የተደረገው በመላ አገሪቱ ምስጢራዊ የመረጃ መረብ ደኅንነት ዘመቻ ከተካሄደ በኋላ ነው።

    በቅርቡ በአውሮፓ የተፈፀመው የሳይበር (የመረጃ መረብ) ጥቃት ከፍተኛ መጠን ያለው ምግብ እንዲበላሽ ደያረገ ሲሆን በሚሊዮኖች የሚቆጠር ፓውንድ ኪሳራ አስከትሏል።

    በዚህ ጥቃት ጉዳት ከደረሰባቸው የአውሮፓ አገራት አንዷ የሆነችው ፈረንሳይ ለክስተቱ ኢራንን ተጠያቂ አድርጋለች።

    ቴህራን ግን የቀረበባትን ክስ ውድቅ አድርጋለች።

    የእንግሊዝ የማቀዝቀዣዎች ኢንደስትሪ የተለያዩ መሣሪያዎችን የሚጠቀም በመሆኑ ዩኬ ከዚህ ጥቃት ማምለጥ እንደቻለች ይታሰባል። ሆኖም ተጋላጭነት ስለነበራት ይህንን ለማስተካከል ዘርፉ ወደ ሥራ የገባው ጊዜ ሳይሰጥ ነበር።

    ባለፈው ወር መጨረሻ የደኅንነት ተመራማሪዎች በማቀዝቀዣዎቹ ላይ ጠላፊዎች ቢያገኙት በዩኬ ላይ ከፍተኛ ጉዳት ሊያስከትል የሚችል ትልቅ ጉድለት አግኝተው ነበር።

    ከዚያም በኋላ ተመራማሪዎች፣ የኢንፎርሜሽን ቴክኖሎጂ ባለሙያዎች እና ብሔራዊ የመረጃ መረብ ደኅነንት ማዕከል በርካታ ኩባንያዎችን ለማስጠንቀቅ ሌት ተቀን ሲሰሩ ነበር።

    በዚህ ዓመት እስካሁን ድረስ በማቀዝቀዣ የሙቀት መቆጣጠሪያ ሥርዓት ላይ ሦስት ዓይነት ጥቃቶች ተፈጽመዋል።

    በነሐሴ ወር በተወሰኑ የአሜሪካ ወታደራዊ ካምፖች ውስጥ የነበሩ ማቀዝቀዣዎች ጉዳት ደርሶባቸዋል።

    መስከረም ወር መጨረሻ ላይም በፈረንሳይ በመቶዎች የሚቆጠሩ ሱፐርማርኬቶች እና የምግብ ማቀነባበሪያ ፋብሪካዎች የሙቀት መቆጣጠሪያ ሥርዓታቸውን ዒላማ ያደረገ ጥቃት ከተፈፀመባቸው በኋላ ጉዳት አጋጥሟቸዋል።

    ጥቅምት መጨረሻም እንዲሁ በሰባት የአውሮፓ አገራት ውስጥ በደርዘን የሚቆጠሩ ሱፐርማርኬቶች የጥቃቱ ሰለባ ሆነዋል።

    ቤልጂየም እና ሉክሰምበርግ እጅግ ከፍተኛ ጉዳት ካስተናገዱት መካከል ይገኙበታል። በፈረንሳይ የተወሰኑ የደም ባንክ ማዕከላትም ጉዳት ደርሶባቸዋል።

    • ተያያዥ ዜናዎች፡
  9. ትራምፕ ስለ ባዮሎጂካል የጦር መሣሪያ ያደረጉት ንግግር “የኢራቅ ጦርነት መነሻን ይመስላል” ስትል ኢራን ምላሽ ሰጠች

    ኢስማኤል ባጋይ

    ፕሬዝዳንት ዶናልድ ትራምፕ ኢራን ባዮሎጂካል የጦር መሣሪያዎችን እየሠራች መሆኑን የሚያመለክት “ፍንጭ መኖሩን” መናገራቸውን ተከትሎ ቴህራን ምላሽ ሰጥታለች።

    የኢራን የውጭ ጉዳይ ሚኒስቴር ቃል አቀባይ ኢስማኤል ባጋይ፤ የትራምፕን ንግግር ከቀድሞው የአሜሪካ የውጭ ጉዳይ ሚኒስትር ኮለን ፓወል ጋር አነጻጽረዋል።

    ጆርጅ ቡሽ የአሜሪካ ፕሬዝዳንት ሳሉ ኮለን ፓወል ስለ ኢራቅ ተመሳሳይ ንግግር አድገው እንደነበር ጠቅሰዋል።

    የኮለን ፓወልን ንግግር ተከትሎ አሜሪካ በኢራቅ ላይ ጦርነት መክፈቷ ይታወሳል።

    ኢስማኤል ባጋይ በኤክስ ገጻቸው ላይ “የአሜሪካ ባለሥልጣናት የኢራን ‘የኒውክሌር መሣሪያ ስጋት ደቅኗል’ ከሚለው ሰፊ ትርክት ወጥተው፣ ኢራን ‘ባዮሎጂካል ወይም ኬሚካል የጦር መሣሪያዎችን እየሠራች እንደሆነ ምልክት አለ’ ብለዋል” ሲሉ ምላሽ ሰጥተዋል።

    የአሜሪካ ባለሥልጣናት በየጊዜው ትርክቱን መቀያየራቸውን በመጥቀስም ተችተዋል።

    “የሚያቀርቡት ክስ እየተለወጠ ነው። ዓለም በአጠቃላይ ከዚህ ቀደም የተፈጠረውን ይዘነጋል ብለው ይጠብቃሉ” ብለዋል።

    ዝነኛው የአሜሪካ አኒሜሽን ፊልም ‘ፋይንዲንግ ኒሞ’ ላይ ያለውን ኒሞ የተባለ የዓሣ ገጸ ባህሪ ከኮለን ፓወል ጋር የሚያነጻጽር ምሥል ለጥፈዋል።

    ኒሞ ቤቱ የጠፋበት ዓሣ ሲሆን፤ ፊልሙም ቤቱን ለማግኘት የሚያደርገውን ጥረት ያሳያል።

    የኢራን የውጭ ጉዳይ ሚኒስቴርቃል አቀባይ ኢስማኤልባጋይ “አሜሪካውያን ግን የእውነት ኮለን ፓወል በ2003 በተመድ የፀጥታው ምክር ቤት ያደረገውን አወዛጋቢ ንግግር እንድረሳው ይፈልጋሉ?” ብለዋል።

    ኢራቅ “ጅምላ ጨራሽ መሣሪያ አላት” በሚል ያደረጉት ንግግር “በዓለም የደኅንነት ታሪክ ጉልህ ከሆኑ ስህተቶች እና በዘመናዊ ታሪክ ከሚጠቀሱ የፖለቲካ ማታለያዎች” መካከል እንደሚጠቀስ ገልጸዋል።

    ከአውሮፓውያኑ 2003 የኮለን ፓወል ንግግር በኋላ አሜሪካ በኢራቅ ላይ ከፍተኛ ወታደራዊ ዘመቻ ከፍታለች፤ ሳዳም ሁሴንን ከሥልጣን አስወግዳም የአገሪቱን መንግሥት እና ጦር አፍርሳለች።

    “አሁንም አስፈሪ ክስ እና ትርክት እየሰማን ነው። ጥያቄው ዓለም ከ2003 ምን ተምሯል? የሚለው ነው። አሁንም ሕዝብ በሰፊው እንዲታለል እንፈቅዳለን?” ሲሉም ኢስማኤል ተናግረዋል።

    ትራምፕ፤ ኢራን ባዮሎጂካል ወይም ኬሚካል የጦር መሣሪያዎችን እየሠራች መሆኑን ፍንጭ እንዳለ የተናገሩት ከፎክስ ኒውስ ጋር ያለፈው ረቡዕ ባደረጉት ቃለ መጠይቅ ነው።

    ማክሰኞ ዕለት የአሜሪካው የቴሌቪዥን ጣቢያ ሲኤንኤን፣ ኢራን የትራም አስተዳደር ባለሥልጣናትን ዒላማ ያደረገው የኬሚካል መሣሪያ ጥቃት ለመፈጸም የሚያስችላትን ዕቅድ እያዘጋጀ መሆኑን የአሜሪካ የስለላ መረጃ ማሳየቱ ዘግቦ ነበር።

    በረቡዕ ዕለቱ ቃለ ምልልስ ላይ የተጠየቁት ትራምፕ፣ ሕዝቡ ስለዚህ ዓይነቱ ጉዳይ ስጋት ሊፈጠርበት እንደማይገባ በመግለጽ ምላሽ ሰጥተዋል።

    “ኒውክሌር እጅግ ጠንካራ ነው፤ እናም ጋዝ እና ባዮ [መሣሪያዎችን] እየተመለከቱ ነው። ታውቃለህ ባዮሎጂካል የጦር መሣሪያዎችን እና ሌሎች ነገሮችን እየተመለከቱ ነው፤ ጥሩ አይደለም” ብለዋል።

    “አዲስ ዓመት እየመጣ ነው፤ [ከአውሮፓውያኑ] ጥር 1 በኋላ ምን እንደሚፈጠር እናያለን” ሲሉም ተደምጠዋል። ትራምፕ አክለውም፣ “ይህ ከተፈጸመ እናጠፋቸዋለን” በማለት አስጠንቅቀዋል።

  10. የኅዳር 11 ቀን 2019 ዓ. ም. የቀጥታ ስርጭት ተጀምሯል

    የቢቢሲ አማርኛ ወዳጆች እንደምን አደራችሁ፤ የሐሙስ ኅዳር 11 ቀን 2019 ዓ. ም. የቀጥታ ስርጭታችን ተጀምሯል።

    የአገር ውስጥ እና የውጭ ዜናዎችን በአጭሩ እናቀርብላችኋለን። አብራችሁን እንድትቆዩ በአክብሮት እንጋብዛለን።